ნათია თურნავა გერმანიის ელჩთან შეხვედრის შესახებ - საქართველო, ჩვენი საფინანსო სისტემა და ეროვნული ბანკი საერთაშორისო ვალდებულებების ერთგულნი ვრჩებით

სებ-ის პრეზიდენტის მოვალეობის შემსრულებელმა, ნათია თურნავამ და გერმანიის ფედერაციული რესპუბლიკის საგანგებო და სრულუფლებიანმა ელჩმა საქართველოში, პიტერ ფიშერმა ეროვნულ ბანკში დღეს გამართულ შეხვედრაზე თანამშრომლობის სამომავლო პერსპექტივები განიხილეს.

ეროვნული ბანკის ინფორმაციით, საუბარი, ასევე, შეეხო აშშ -ის, დიდი ბრიტანეთისა და ევროკავშირის მიერ რუსეთის უკრაინაში შეჭრის შედეგად დაწესებული ფინანსური სანქციების აღსრულების საკითხს და სანქციათა შესრულების წესში ცვლილებას. ნათია თურნავამ განაცხადა, რომ სებ-მა საქართველოს კონსტიტუციით გარანტირებული საქართველოს მოქალაქის უფლებებისა და თავისუფლებების სრულყოფილად რეალიზების მიზნით შეიმუშავა და აამოქმედა აღნიშნული ცვლილება. პრეზიდენტის მოვალეობის შემსრულებელმა ხაზგასმით აღნიშნა, რომ ეროვნული ბანკი მუდმივ კომუნიკაციაშია კომერციულ ბანკებთან და განაგრძობს საერთაშორისო სანქციების აღსრულებას.

„გერმანიის ელჩთან და მის კოლეგებთან შეხვედრაზე განვიხილეთ ერთობლივი პროექტები. ჩვენ დიდი ხანია ვთანამშრომლობთ როგორც გერმანიის ცენტრალურ ბანკთან, კომერციულ ბანკებთან, ასევე, სხვადასხვა გერმანულ საფინანსო ინსტიტუტთან. აღვნიშნეთ, რომ ძალიან მადლიერები ვართ იმ მხარდაჭერისა და თანამშრომლობისთვის, რასაც გერმანიის მთავრობისგან და გერმანიის საფინანსო სექტორიდან ვიღებთ. ასევე, ვისაუბრეთ იმ ცვლილებებზე, რომლებიც საქართველოს ეროვნულმა ბანკმა განახორციელა სანქციების აღსრულების წესში და საქართველოს მოქალაქეებზე განსხვავებული პროცედურები დააწესა. ცალსახად აღვნიშნეთ, რომ საქართველო, ჩვენი საფინანსო სისტემა, ეროვნული ბანკი, ვრჩებით ჩვენი საერთაშორისო ვალდებულებების ერთგულნი. რაც შეეხება ცალკეულ იურიდიულ საკითხს, აღსრულებადობას და ა.შ ჩვენ მივყვებით საერთაშორისო პრაქტიკას და მზად ვართ, რომ ამაზე დეტალური ინფორმაცია მივაწოდოთ ყველა დაინტერესებულ მხარეს“, - განაცხადა ნათია თურნავამ.

„ეროვნული ბანკის პირველ ვიცე-პრეზიდენტთან კარგი შეხვედრა შედგა. ჩვენი შეხვედრის და დისკუსიის თემა საქართველოს ევროკავშირისკენ მიმავალი გზა იყო. განვიხილეთ ინსტიტუციური და ეკონომიკური რეფორმები, რაც ძალიან მნიშვნელოვანია. ასევე აღინიშნა ხანგრძლივი და ნაყოფიერი თანამშრომლობა სებ-სა და გერმანიის ცენტრალურ ბანკს-ბუნდესბანკს შორის. ახლა, როცა საქართველო კანდიდატის სტატუსის და ევროკავშირის წევრობისკენ ნაბიჯებს დგამს, გვინდა, ჩვენი თანამშრომლობა მომავალში კიდევ უფრო გავაღრმაოთ და გავაფართოოთ. ასევე ვისაუბრეთ ბოლოდროინდელ მოვლენებზე და ვაფასებ პირველი ვიცე-პრეზიდენტის დეტალურ განმარტებას, რომელიც მან მომაწოდა“, - განაცხადა გერმანიის ფედერაციული რესპუბლიკის საგანგებო და სრულუფლებიანმა ელჩმა საქართველოში, პიტერ ფიშერმა.

საქართველოს ეროვნული ბანკი მჭიდროდ თანამშრომლობს გერმანიის სხვადასხვა საფინანსო ინსტიტუტთან. შეხვედრაზე აღინიშნა საქართველოსა და გერმანიას შორის არსებული მრავალწლიანი, წარმატებული პარტნიორობა. გერმანიის ბუნდესბანკის ექსპერტებმა ეროვნულ ბანკს უდიდესი დახმარება გაუწიეს და მხოლოდ მათი დიდი მხარდაჭერით გახდა შესაძლებელი 2012 წელს თანამედროვე სტანდარტების საკასო ცენტრის მშენებლობა და ფუნქციონირება.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ქართული პრესის მიმოხილვა 17.06.2024
ესტონეთის ელჩი - თუ გვინდა ევროკავშირის წევრობა, უნდა ვითამაშოთ წესების მიხედვით - საქართველოს ხელისუფლება ამბობს, რომ უახლოვდება ევროკავშირს, მაგრამ მათი ქმედებები ამას არ ადასტურებს
„დაგროვებითი პენსიის შესახებ“ კანონში ცვლილებები შედის - რა სიახლეებს უნდა ელოდონ საპენსიო სქემის მონაწილეები
როგორ ვებრძოლოთ მოგზაურთა დიარეას
„სიმეტრია პარკი“ მთაწმინდის რაიონში კომერციული ფართის მშენებლობის დასრულებას აანონსებს
ISET-ის ფინანსების სამაგისტრო პროგრამამ CFA ინსტიტუტთან აფილირება მიიღო
„ბიზნეს ოსკარად“ წოდებული „ოქროს ბრენდის“ დაჯილდოებაზე PSP კვლავ N1 ფარმაცევტულ ბრენდად აღიარეს