ნინო ვარდოსანიძე - არ შეიძლება აგრესია და ურთიერთუპატივცემულობა პოლიტიკის სახელით გამართლდეს

თბილისის საკრებულოს სხდომაზე საკრებულოს სახელდებისა და სიმბოლიკის კომისიის თავმჯდომარე ნინო ვარდოსანიძემ, რამდენიმე საკითხზე გაამახვილა ყურადღება. მან პოლიტიკაში ქალების როლზე ისაუბრა. მისი განცხადებით, ეს საკითხი მნიშვნელოვანია არა მხოლოდ ქალებისთვის და მათი გააქტიურებისთვის საზოგადოებრივ ცხოვრებაში, არამედ პოლიტიკაში გარემოს გაჯანსაღებისთვის.

„ის სურათი, რომელიც ძირითადად ჩანს საზოგადოებისთვის, ვფიქრობ, არ იძლევა ბევრი ქალისთვის მოტივაციას, რომ ნაბიჯი გადადგას ამ მიმართულებით. უნდა აღვნიშნო, რომ საკრებულოში მეტ-ნაკლებად უკეთესი სტანდარტია და ვისურვებდი მის კიდევ უფრო გაუმჯობესებას.

დამეთანხმებით ალბათ, რომ არავის, მით უფრო ქალს, არ ექნება სურვილი იყოს იქ, სადაც არის შეურაცხყოფა, ურთიერთუპატივცემულობა, აგრესია და არ შეიძლება ეს ყველაფერი პოლიტიკის სახელით გამართლდეს. უფრო მეტიც, ვფიქრობ, პოლიტიკა ერთ-ერთი ის სფეროა, რომელიც პირდაპირ ახდენს გავლენას საზოგადოების ქცევაზეც.

ვისურვებდი, რომ ყველა ქალმა, ვინც პოლიტიკაშია, რეალურად იმუშაოს და გაიღოს ძალისხმევა, რომ გააძლიერონ სხვა ქალები და რეალურად შეუწყოს ხელი მათ პოლიტიკაში ჩართვას და არ შემოიფარგლოს სამუშაო შეხვედრებზე გაკეთებული პათეტიკური განცხადებებით“, - განაცხადა ნინო ვარდოსანიძემ.

სახელდებისა და სიმბოლიკის კომისიის თავმჯდომარემ ასევე ისაუბრა დედაქალაქის მთავრობის მიერ მიღებულ გადაწყვეტილებებზე.

„მინდა რამდენიმე საკითხს შევეხო. თბილისის მერმა მთავრობის სხდომაზე გააჟღერა რამდენიმე მნიშვნელოვანი ინიციატივა და ერთ-ერთი ასეთი არის გაფანტული სკლეროზის მკურნალობის პროგრამა. ინიციატივის მიხედვით და დღეს ჩვენი გადაწყვეტილების შემდეგ, მოხდება თბილისში რეგისტრირებული მოქალაქეების 100%-ით დაფინანსება როგორც კვლევების, ისე მკურნალობის ეტაპზე.

ამას გარდა, წინა სხდომაზე ჩვენ დავამტკიცეთ პროგრამა სახსრების ენდოპროთეზირების შესახებ, რომლის მიხედვითაც, ჩვენს ქალაქში მცხოვრებლებს სრულად დაუფინანსდებათ აღნიშნული ოპერაცია. რამდენიმე წლის წინ პირადად მქონდა შეხება ამ ოპერაციასთან (ოჯახის წევრის მდგომარეობიდან გამომდინარე). ის მცირე თანხებს არ საჭიროებს და საკმაოდ მოთხოვნადი და ხშირი ოპერაციაა, განსაკუთრებით ქალებში. ეს ყველაფერი კი მიუთითებს ორივე მიმართულების, ჯანდაცვის და სოციალური მიმართულების, პრიორიტეტზე და მნიშვნელოვანია, რომ ეს მიმართულებები დარჩეს პრიორიტეტად და ამისთვის მუნიციპალიტეტმა გაიღოს თანხები“, - განაცხადა ნინო ვარდოსანიძემ.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ესტონეთის ელჩი - თუ გვინდა ევროკავშირის წევრობა, უნდა ვითამაშოთ წესების მიხედვით - საქართველოს ხელისუფლება ამბობს, რომ უახლოვდება ევროკავშირს, მაგრამ მათი ქმედებები ამას არ ადასტურებს
ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
მწვანე განვითარების მხარდაჭერა თუ ხელის შეშლა - „ჭარბი საწარმოო სიმძლავრის“ თეორიის სიყალბე
„საქკაბელმა“ ბრონირებული NAYBY კაბელის წარმოება დაიწყო
4 რჩევა სამსუნგის ინჟინრებისგან თუ როგორ გამოიყენო Windfree კონდიციონერი ყველაზე ეფექტურად
ბათუმში „ლისი დეველოპმენტის“ ახალი პროექტის - ბუკნარის პრეზენტაცია გაიმართა
ქართული პრესის მიმოხილვა 20.06.2024