ღარიბაშვილმა, ქონების დიდი ნაწილი დააგროვა კორუფციით, ხალხის გაღარიბებით და სახელმწიფო ქონების მიტაცებით, - ამის შესახებ “ერთიანი ნაციონალური მოძრაობის” წევრმა, გიორგი კაპანაძემ ბრიფინგზე განაცხადა, სადაც პრემიერ - მინისტრ, ირაკლი ღარიბაშვილის ქონებაზე ისაუბრა.
გიორგი კაპანაძის განცხადებით, ღარიბაშვილის ქონება ხელისუფლებაში ყოფნის პერიოდში საშუალოდ 10-ჯერ გაიზარდა.
“ღარიბაშვილმა ქონების დიდი ნაწილი დააგროვა კორუფციით, ხალხის გაღარიბებით და სახელმწიფო ქონების მიტაცებით.
2012 წელს, ღარიბაშვილი ფლობდა: 3 ბინას, 1 ავტოფარეხს, 2 არასაცხოვრებელ ფართს. ასევე, საშუალო ღირებულების 2 ავტომანქანას.
მიმდინარე ანგარიშზე ჰქონდა 1 ევრო, 4 დოლარი, 21 ლარი. საკრედიტო ბარათზე კი, ხელმისაწვდომი ჰქონდა 2338 ლარი. დანაზოგის სახით ჰქონდა 20 ათასი ლარი.
2023 წელს, ღარიბაშვილი, ზემოთჩამოთვლილი უძრავი ქონების გარდა, ფლობს: 1. აგარაკს ბაკურიანში - საშუალო ფასი 350 ათასი დოლარი. 2. ტყეს ბაკურიანში - საშუალო ფასი 300 ათასი დოლარი. 3. მიწის ნაკვეთს ბაკურიანში - შეფასებულია 76 500 დოლარად. 4. "რენჯ როვერს" - შეფასებულია 46 ათას ევროდ. 5. აუდის მარკის ავტომობილს - შეფასებულია 75 620 ევროდ. 6. აქვს დანაზოგი - 50 ათასი ლარი. 7. მშობლებისგან მიიღო საჩუქარი - 150 ათასი ლარი. 8. აქვს საათების კოლექცია - შეფასებულია 500 ათასად. და ეს, რაც ოფიციალურად არის ცნობილი.
ღარიბაშვილის ქონება, ხელისუფლებაში ყოფნის პერიოდში გაიზარდა, საშუალოდ, 10-ჯერ, მაშინ, როდესაც 2012 წლამდე, მას უფრო მეტი შემოსავალი ჰქონდა, კომერციულ ბანკში მუშაობით, ვიდრე აქვს დღეს. ღარიბაშვილი არის მსხვილი კორუფციონერი და მან უნდა იცოდეს: მოუწევს, უკან მოიტანოს მოპარული ქონება და დაუბრუნოს ხალხს”, - განაცხადა გიორგი კაპანაძემ.