თუ კანდიდატის სტატუსი ვერ მივიღეთ, არ გამოხვიდეთ, შევეგუოთ, რუსული ჯარი მოვა, ჩვენ მოვალთ, შეგჭამთ, გამოგხრავთ, ხმა არ ამოიღოთ - ეს არის „ქართული ოცნების" სცენარი , - ამის შესახებ "სტრატეგია აღმაშენებლის" დეპუტატმა პაატა მანჯგალაძემ განაცხადა.

მანჯგალაძე სუს-ის მიერ გამოქვეყნებულ ინფორმაციას და მასთან დაკავშირებით "ქართული ოცნების" ლიდერების განცხადებებს გამოეხმაურა და აღნიშნა, რომ ეს ფარცხალაძის ჯაშუშობის გადაფარვას და ხალხის დაშინებას ემსახურება.

"სუს-მა ფარცხალაძის ჯაშუშობის გადასაფარად შემოგვთავაზა მორიგი სერია, "აკერმანი 2". აკერმანი გარდაცვლილი იყო და მედიაში საუბრობდნენ, რომ გარდაცვლილი ადამიანი რაღაცას აპირებდა საქართველოში. სამაგიეროს უხდიან ამერიკულ სპეცსამსახურებს თითქოს USAID- მა საქართველოში შემოიყვანა ადამიანები, რომლებიც გეგმავდნენ არეულობას. ეს არის რუსული სპეცსამსახურების სამაგიეროს გადახდის მცდელობა ამერიკული სპეცსამსახურებისთვის, ასე დავარქვათ ამ ბოდვას.

სამწუხაროა, რომ სუს-ი მონაწილეობს ამ საპნის ოპერაში. ესაა იაფფასიანი ბოდვა, "აკერმანი 2" სერია, როცა გარდაცვლილ ადამიანს კიდევ ერთი თვე აბრალებდნენ საქართველოში რევოლუციის მოწყობას. "ქართული ოცნების” პოლიტიკურად გახრწნილი პოლიტიკოსები საუბრობენ ამერიკელი გადასახადების გადამხდელთა ფულზე მაშინ, როცა ღარიბაშვილის და კალაძის ჩარტერების სკანდალი გვახსოვს, გასარუჯად რომ წავიდა კალაძე დუბაიში და ეს ხალხი ნიანგის ცრემლებს ღვრის ამერიკელი გადამხდელების ფულის გამო?! ვის სჯერა ამ იაფფასიანი პროპაგანდის?! ამის მიზანია ადამიანების დაშინება: "თუ კანდიდატის სტატუსი ვერ მივიღეთ, არ გამოხვიდეთ, შევეგუოთ, რუსული ჯარი მოვა, ჩვენ მოვალთ, შეგჭამთ, გამოგხრავთ, ხმა არ ამოიღოთ" -ეს არის "ქართული ოცნების" სცენარი", - განაცხადა მანჯგალაძემ.

ცნობისთვის, სახელმწიფო უსაფრთხოების სამსახური ორგანიზაცია „კანვასის“ მიმართ ჩატარებული საგამოძიებო მოქმედების შესახებ ინფორმაციას ავრცელებს და "მტკიცებულებების ნაწილს" ასაჯაროებს.

სუს-ის ინფორმაციით, 2023 წლის 25 სექტემბერს საქართველოში USAID-ის პროგრამის აღმოსავლეთ-დასავლეთის მართვის ინსტიტუტის მოწვევით ჩამოვიდნენ სერბეთის მოქალაქეები სინისა სიკმანი, იელენა სტოისიჩი და სლობოდან ჯინოვიჩი, რომლებიც დაკავშირებული არიან 2003 წელს საქართველოში განვითარებულ რევოლუციურ მოვლენებთან, სხვადასხვა წლებში კი მათ ასევე კავშირი ჰქონდათ სერბეთში, უკრაინასა და სხვა სახელმწიფოებში მიმდინარე ანალოგიურ პროცესებთან.

ისინი აქტიურად ახორციელებდნენ საპროტესტო მუხტის წარმოქმნის მეთოდიკისა და ძალადობრივი აქციების ჩატარების ტაქტიკის სწავლებას. წარმოადგენენ ორგანიზაცია „კანვასის“ მმართველ რგოლს, აგრეთვე, სინისა სიკმანი და სლობოდან ჯინოვიჩი არიან ორგანიზაცია „ოტპორის“ ყოფილი წევრები, რომელიც სერბეთში წარმოადგენდა ქართული ორგანიზაცია „კმარას“ ანალოგს.

სუს-ის თანახმად, აღნიშნული პირების საქართველოში ჩამოსვლის გაცხადებული მიზეზი იყო კულტურის სფეროში მოღვაწე ჯგუფებისთვის ტრენინგების ჩატარება ,,სტრატეგიული არაძალადობრივი ბრძოლის“ საკითხებში, მაგრამ გამოძიებით დადგინდა, რომ საქართველოში მათი ჩამოსვლის მიზანი მხოლოდ ეს არ იყო. კერძოდ, ვიზიტის რეალური დანიშნულება იყო იმ ახალგაზრდებსა და გავლენიან არასამთავრობო ორგანიზაციებთან კომუნიკაციის დამყარება და ტრენინგების ჩატარება, რომლებიც საქართველოში მიმდინარე წლის ოქტომბერ-დეკემბერში დაგეგმილი დესტრუქციული მოქმედებების და კანონსაწინააღმდეგო ქმედებების ბირთვი უნდა გახდნენ.

სახელმწიფო უსაფრთხოების სამსახური აცხადებს, 26-29 სექტემბერს USAID-ის დაფინანსებით ჩატარებულ კონფერენციას ორგანიზება „კანვას-საქართველომ“ და აღმოსავლეთ-დასავლეთ მართვის ინსტიტუტმა გაუწიეს.