პარლამენტის იურიდიულ საკითხთა კომიტეტმა „შეკრებებისა და მანიფესტაციების შესახებ“ კანონში დაგეგმილ ცვლილებებს, პირველი მოსმენით, მხარი დაუჭირა

პარლამენტის იურიდიულ საკითხთა კომიტეტმა „შეკრებებისა და მანიფესტაციების შესახებ“ კანონში დაგეგმილ ცვლილებებს, პირველი მოსმენით, მხარი დაუჭირა.

უმრავლესობის წევრებმა მხარდაჭერა ერთხმად გამოხატეს, წინააღმდეგი არც ერთი დეპუტატი არ ყოფილა.

სხდომაზე კანონპროექტი განათლებისა და მეცნიერების კომიტეტის თავმჯდომარემ, გივი მიქანაძემ წარადგინა.

მისი თქმით, კანონში შესატანი ცვლილებები კარვის დადგმას არ კრძალავს, თუმცა იმ კონკრეტულ საფუძვლებს განსაზღვრავს, თუ რა შემთხვევაში იკრძალება ამის გაკეთება.

მიქანაძის განცხადებით, აღნიშნული კანონპროექტი ასევე, სამართალდამცავი ორგანოების მოქმედების არეალს ადგენს, კერძოდ, თითოეულ კონკრეტულ ნაბიჯს, რაც სამართალდამცავი უწყებების მხრიდან უნდა გადაიდგას.

„აქ არაერთხელ გაიჟღერა სიტყვა კარავმა. მინდა გითხრათ, რომ ჩვენ საუბარი გვაქვს დროებით კონსტრუქციაზე, რომლის ერთ-ერთი კომპონენტი შეიძლება იყოს კარავი, თუმცა ეს არ არის ერთადერთი კომპონენტი. მე ვაკვირდები პროცესებს, როდესაც ამ კანონპროექტზე დაიწყო საუბარი, რომ მცდელობა არის კარვების კონტექსტში რომ მოხდეს გადატანა და საზოგადოებას არასწორი ინფორმაცია მიეწოდოს, რომ თითქოს ეს არის კარვების ამკრძალავი. მშვიდობიანი მანიფესტაციის და შეკრების დროს კარვების დადგმას არავინ არ კრძალავს, არც ეს ცვლილებები და არც მოქმედი კანონი, რომლის ძირითადი ნაწილი ხელშეუხებელი რჩება. ნებისმიერ ადამიანს, რა თქმა უნდა, შეუძლია, კარავი დადგას, თუმცა ის უნდა აკმაყოფილებდეს იმ კრიტერიუმებს, რომელიც წინააღმდეგობაში არ მოდის იმასთან, რასაც ახლა განვსაზღვრავთ“, - განაცხადა მიქანაძემ.

შეგახსენებთ, პარლამენტი დაჩქარებული წესით იხილავს „შეკრებებისა და მანიფესტაციების“ შესახებ კანონში ცვლილებებს, რომლითაც შეკრებისა და მანიფესტაციების დროს დროებითი კონსტრუქციების მოწყობასთან დაკავშირებით კანონი მკაცრდება. შემოდის ახალი ამკრძალავი ნორმები.

“ქართული ოცნების“ დეპუტატების ინიციატივით მომზადებული პროექტის გათვალისწინებით, შეკრებისა და მანიფესტაციის მონაწილეებს დროებითი კონსტრუქციების მოწყობა ეკრძალებათ თუ მისი მოწყობა: საფრთხეს უქმნის შეკრების ან მანიფესტაციის მონაწილეებს ან სხვა პირებს; ხელს უშლის პოლიციის მიერ საზოგადოებრივი წესრიგისა და უსაფრთხოების დაცვას; იწვევს საწარმოს, დაწესებულების ან ორგანიზაციის ნორმალური ფუნქციონირების შეფერხებას; შეკრების ან მანიფესტაციის ჩატარებას არ უკავშირდება.

ამასთან, კანონის პროექტის მიხედვით, „საჯარო სივრცის იერსახის დამახინჯების თავიდან აცილების მიზნით“, შეკრების ან მანიფესტაციის მონაწილეებს დროებითი კონსტრუქციის მოწყობა იმ შემთხვევაშიც ეკრძალებათ, თუ მისი მოწყობის გარეშე შეკრების ან მანიფესტაციის ჩატარება არსებითად არ ფერხდება.

ამ ახალი ამკრძალავი ნორმების დარღვევა გამოიწვევს სამართალდარღვევის საგნის კონფისკაციას და დაჯარიმებას 500 ლარის ოდენობით ან სამართალდარღვევის საგნის კონფისკაციას და ადმინისტრაციულ პატიმრობას 15 დღემდე ვადით, ხოლო თუ დამრღვევი ორგანიზატორია - სამართალდარღვევის საგნის კონფისკაციას და დაჯარიმებას 5000 ლარის ოდენობით ან ადმინისტრაციულ პატიმრობას 15 დღემდე ვადით.

ლევან იოსელიანი - სამწუხაროა, რომ საქართველო პატიმრების რაოდენობით ევროპის მასშტაბით, ისევ მეორე ადგილზეა - ქვეყანაში 9 500 პატიმარია, ეს რიცხვი საკმაოდ მაღალია, მისი შემცირება შესაძლებელია
ბორის სოკოლოვი - რუსეთისთვის ჩინურ იუანზე ორიენტაცია სახიფათოა, რადგან, ჩინურ ხელისუფლებას საკუთარი შეხედულებისამებრ შეუძლია იუანის კურსის დადგენა, სამწუხაროდ, ომი უკრაინაში 2024 წელს არ დასრულდება
ქართული პრესის მიმოხილვა 17.06.2024
შექმენი შენზე მორგებული კომბინაცია მობილური პაკეტით „მეტი“
„ბრიტანულ-ქართული აკადემიის“ დირექტორის, ნათია ჯანაშიას ადვოკატმა სს „საქართველოს კაპიტალის“ და შპს „საქართველოს განათლების ჯგუფის“ დირექტორების წინააღმდეგ პროკურატურას სარჩელით მიმართა
„არქიმ“ და „დელოიტმა“ აუდიტის მომსახურების ხელშეკრულება გააფორმეს
ზაფხულის ყველაზე ცხელი შემოთავაზება HONOR-ისგან - დაიწყე ახალი სეზონი ახალ სმარტფონთან ერთად
Skillwill-ი კემბრიჯის უნივერსიტეტთან თანამშრომლობას იწყებს
ისრაელის ელჩი ჰადას მეიცადი - ის, ვინც იწყებს ომს და შემდეგ აგებს, არ არის მსხვერპლი