იაგო ხვიჩია - სუს-ში კრეატიული კრიზისია და ვინმე მწერალი უნდა აიყვანონ უკეთესი სცენარებისთვის - ზოგადად, „ვაჟას ბოლოდან“ ვაშინგტონთან ბრძოლა სასაცილოდ გამოიყურება

სუს-ში ცოტა კრეატიული კრიზისია და მაგათ ვინმე მწერალი უნდა აიყვანონ უკეთესი სცენარებისთვის - ზოგადად, „ვაჟას ბოლოდან“ ვაშინგტონთან ბრძოლა სასაცილოდ გამოიყურება,- ამის შესახებ „გირჩის“ დეპუტატმა იაგო ხვიჩიამ განაცხადა, რითაც სუს-ის განცხადებას გამოეხმაურა იმასთან დაკავშირებით, რომ USAID აფინანსებს ტრენინგს, სადაც ტრენერების მიზანია „ახალგაზრდებსა და გავლენიან არასამთავრობო ორგანიზაციებთან კომუნიკაციის დამყარება და და ტრენინგების ჩატარება, რომლებიც საქართველოში მიმდინარე წლის ოქტომბერ-დეკემბერში დაგეგმილი დესტრუქციული მოქმედებების და კანონსაწინააღმდეგო ქმედებების ბირთვი უნდა გახდნენ“.

როგორც ხვიჩია აღნიშნავს, ამერიკასთან ბრძოლის გამოცხადება ტრაგიკომედიაა და ამ იდეების ავტორებისთვის, ეს წესით კარგად არ უნდა დამთავრდეს.

„ზოგადად, ვაჟას (ვაჟა - ფშაველას გამზირი) ბოლოდან ვაშინგტონთან ბრძოლა სასაცილოდ გამოიყურება. რამდენ ხანს გაგრძელდება ეს ტრაგიკომედია, რომ ამერიკასთან გვაქვს ბრძოლა გამოცხადებული, მე ვერ გეტყვით. უბრალოდ, დარწმუნებული ვარ, რომ იმისთვის, ვისაც ასეთი ჭკვიანური იდეები თავში მოსდის, ეს წესით, კარგად არ უნდა დამთავრდეს. ზოგადად მგონია, რომ სუს-ში ცოტა კრეატიული კრიზისია და მაგათ ვინმე მწერალი ან პოეტი უნდა აიყვანონ შტატში, რომ სცენარები უკეთესად იყოს მოფიქრებული და დამაჯერებლად. მწერლებს ასეთი ნიჭი გააჩნიათ, ბიუროკრატებს ცოტა უჭირთ,“ - განაცხადა ხვიჩიამ.

ხვიჩია ასევე, გამოეხმაურა „შეკრებისა და მანიფესტაციების შესახებ“ კანონში ცვლილებებსაც, რომელიც კარვის და დროებითი კონსტრუქციების განთავსების შემზღუდავი ნორმების ამოქმედებას ითვალისწინებს.

„კანონპროექტის ავტორები გვეუბნებიან, რომ ძალადობის და რევოლუციის მცდელობის თავიდან აცილება უნდათ და რაღაც ასეთი უცნაური სიტყვების ერთობლიობას საუბრობდნენ მაშინ, როცა კარავი ის ნივთი არაა, რომელიც ადამიანის ჯანმრთელობას აყენებს ზიანს ან უსაფრთხოების რისკებს ქმნის. კარვის აკრძალვით რომ უსაფრთხოება იყოს დაცული, აბსურდად გამოიყურება. მე დამრჩა განცდა, რომ ამ კანონის რეალური მიზანია, ადამიანებს შეუქმნან გაცდა, თითქოს მართლა რევოლუცია ხდება და ქვეყნის გადასარჩენად იბრძვის ჩვენი ხელისუფლება. ესაა ჩემი აზრით ამის დანიშნულება და არა ის, რომ პოლიციას აქამდე აკლდა უფლებები, რომ კარავი წაერთვა აქციის მონაწილისთვის, მის გაშლამდე ართმევდნენ ხალხს, ადამიანები დაუკავებიათ ისეთი ნივთებისთვის, როგორიცაა შეშა,“ - განაცხადა ხვიჩიამ.

ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
ქართული პრესის მიმოხილვა 24.06.2024
„საქკაბელმა“ ბრონირებული NAYBY კაბელის წარმოება დაიწყო
4 რჩევა სამსუნგის ინჟინრებისგან თუ როგორ გამოიყენო Windfree კონდიციონერი ყველაზე ეფექტურად