ეს არ არის სწორი სამართალწარმოების პროცესი. რასაც ჩვენ ახლა ვხედავთ, ეს არ არის ის, რაც უნდა ხდებოდეს, - ამის შესახებ საქართველოს პრეზიდენტის წარმომადგენელმა, მაია კოპალეიშვილმა საკონსტიტუციო სასამართლოს სხდომაზე განაცხადა, სადაც პრეზიდენტის იმპიჩმენტის წარდგინების განხილვა მიმდინარეობს. კოპალეიშვილი „ქართული ოცნების“ თავმჯდომარის, ირაკლი კობახიძის განცხადებებს გამოეხმაურა, რომელიც კანონმდებლობისა და კონსტიტუციის ჰარმონიზაციის პროცესში არსებულ პრობლემებზე საუბრობდა.

მაია კოპალეიშვილის განცხადებით, ირაკლი კობახიძე სამართალწარმოების ფარგლებს გარეთ მოქმედებს და პროცესზე ლექციას ატარებს.

„წარდგინების ავტორი მოქმედებდა სამართალწარმოების ფარგლებს გარეთ, ატარებს აქ ლექციას საკანონმდებლო ტექნიკასთან და პროცესთან დაკავშირებით. მთელი სასამართლო უსმენთ ამას მდუმარედ. ეს არ არის სწორი სამართალწარმოების პროცესი. რასაც ჩვენ ახლა ვხედავთ, ეს არ არის ის, რაც უნდა ხდებოდეს. თუკი კითხვის დასმა უნდა, ეს უნდა იყოს სრულიად სხვაგვარად და არა მიშველება“, - განაცხადა მაია კოპალეიშვილმა.

როგორც მაია კოპალეიშვილმა განაცხადა, საქართველოს მთავრობის ადმინისტრაციის საპარლამენტო მდივნის, ვახტანგ ბაჩიაშვილის დახმარება საჭირო არაა.

„არსებობს შეჯიბრებითობის პრინციპი და შეჯიბრებითობის პრინციპიდან გამომდინარე ორივე მონაწილე თანაბარსაწყისებზე უნდა იყოს. მე არ მივცემ თავს იმის უფლებას, რომ იმ საკითხებზე ვისაუბრო, რა საკითხებზეც ბატონი ირაკლი აძლევს თავს უფლებას, რომ ისაუბროს. მე ბატონ ირაკლის პატივს ვცემ, მესმის მისი გულისტკივილი და შესაძლო შფოთვა საკანონმდებლო მდგომარეობასთან დაკავშირებით, მაგრამ ამ შემთხვევაში ბატონ ვახტანგის დახმარება არ არის საჭირო“, - განაცხადა მაია კოპალეიშვილმა.

საკონსტიტუციო სასამართლოს თავმჯდომარე მერაბ ტურავამ მაია კოპალეიშვილის განცხადებებს უპასუხა და აღნიშნა, რომ „კონსტიტუციური წარდგინების განხილვის პროცედურა კანონმდებლობაში არ არის განსაზღვრული, ამიტომ სასამართლომ შეიძლება ეს არაორდინალურად წარმართოს“.

„ამ შემთხვევაში მოსამართლეებმა დასვეს შეკითხვები, რომელიც პირაპირ არ ეხებოდა იმ სამ ფაქტს და უპასუხა მთავრობის წარმომადგენელმა. თქვენც გაძლევთ სიტყვას ასეთ შემთხვევაში“, - განაცხადა მერაბ ტურავამ.