ჯაბა სამუშიამ მეცნიერებისა და ინოვაციის საერთაშორისო დღისადმი მიძღვნილი ღონისძიება გახსნა

მეცნიერებისა და ინოვაციის საერთაშორისო დღესთან დაკავშირებით თსუ-ში ბაქტერიოფაგების პრაქტიკული გამოყენების შესაძლებლობაზე ცნობილი მეცნიერის დავით ფრანგიშვილის საჯარო ლექცია და დისკუსია გაიმართა, რომელიც თსუ რექტორმა, აკადემიკოსმა ჯაბა სამუშიამ გახსნა. ამ ღონისძიებით საქართველო შეუერთდა FAO-ს ევროპისა და ცენტრალური აზიის რეგიონული წარმომადგენლობის მიერ ორგანიზებულ მეცნიერებისა და ინოვაციების კვირეულს.

ამის შესახებ ინფორმაციას თბილისის სახელმწიფო უნივერსიტეტი ავრცელებს.

„დავით ფრანგიშვილი არის ადამიანი, რომელიც თავისი სამეცნიერო მოღვაწეობით არის ნამდვილი ნიმუში თუ როგორ შემოდის ევროპული სამეცნიერო და საგანმანათლებლო კულტურა საქართველოში” - ასე წარადგინა თბილისის სახელმწიფო უნივერსიტეტის რექტორმა ჯაბა სამუშიამ გამოჩენილი ვირუსოლოგი, პარიზის პასტერის ინსტიტუტის საპატიო პროფესორი, თსუ-ს მოწვეული პროფესორი, საქართველოს ზოგადი და გამოყენებითი მიკრობიოლოგიის ასოციაციის პრეზიდენტი, რომელმაც თსუ სტუდენტებისთვის, პროფესორებისთვის, მოწვეული სტუმრებისთვის საჯარო ლექცია „ბაქტერიოფაგები: ჯანსაღი ეკოსისტემის გარანტი” წაიკითხა.

მათივე ინფორმაციით, დავით ფრანგიშვილმა ლექციაზე ისაუბრა ბაქტერიოფაგების როლზე ბუნებაში, მათ გავლენაზე მიკრობულ პოპულაციებსა და ბაქტერიოფაგების გამოყენების პრაქტიკაზე მედიცინაში.

„ჩემი დღევანდელი მოხსენების მიზანია, მოგიყვეთ რა წვლილი შეიძლება შეიტანოს ქართულ მეცნიერებაში დაგროვილმა გამოცდილებამ ევოლუციური, ახალი ტექნოლოგიური მიდგომების განვითარებაში“, - განაცხადა დავით ფრანგიშვილმა.

გავრცელებული ინფორმაციით, მეცნიერებსა და დაინტერესებულ სტუდენტებთან ერთად, ღონისძიებას დაესწრნენ საფრანგეთის რესპუბლიკის საგანგებო და სრულუფლებიანი ელჩი საქართველოში შერაზ გასრი, საქართველოს პარლამენტის, საქართველოს განათლებისა და მეცნიერების სამინისტროს და გარემოს დაცვისა და სოფლის მეურნეობის სამინისტროს წარმომადგენლები, FAO-სა და WHO-ს საქართველოს ოფისების წარმომადგენლები.

„ბაქტერიოფაგების შესახებ პანელურ დისკუსიაში მონაწილეობდნენ: ელიავას სახელობის ბაქტერიოფაგიის, მიკრობიოლოგიისა და ვირუსოლოგიის ინსტიტუტის დირექტორი, დოქტორი მზია ქუთათელაძე, ნიუ ვიჟენ უნივერსიტეტის სრული პროფესორი, ელიავას სახელობის ინსტიტუტის მიკრობული ბიოტექნოლოგიის ლაბორატორიის უფროსი, პროფესორი ნინო ჭანიშვილი, დაავადებათა კონტროლის ეროვნული ცენტრის წარმომადგენელი, საქართველოს გარემოს დაცვისა და სოფლის მეურნეობის სამინისტროს სოფლის მეურნეობის სამეცნიერო-კვლევითი ცენტრის წარმომადგენელი, FAO-საქართველოს ცხოველთა ეროვნული იდენტიფიკაციისა და მიკვლევადობის სისტემის (NAITS) პროგრამის მენეჯერი, ვეტერინარი მიხეილ სოხაძე.

ღონისძიების ორგანიზატორები იყვნენ: გაეროს სურსათისა და სოფლის მეურნეობის ორგანიზაცია (FAO); ჯანმრთელობის მსოფლიო ორგანიზაცია (WHO); საქართველოს გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრი; ივანე ჯავახიშვილის სახელობის თბილისის სახელმწიფო უნივერსიტეტი; საქართველოს ზოგადი და გამოყენებითი მიკრობიოლოგიის ასოციაცია“, - აღნიშნულია ინფორმაციაში.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ქართული პრესის მიმოხილვა 17.06.2024
ესტონეთის ელჩი - თუ გვინდა ევროკავშირის წევრობა, უნდა ვითამაშოთ წესების მიხედვით - საქართველოს ხელისუფლება ამბობს, რომ უახლოვდება ევროკავშირს, მაგრამ მათი ქმედებები ამას არ ადასტურებს
„დაგროვებითი პენსიის შესახებ“ კანონში ცვლილებები შედის - რა სიახლეებს უნდა ელოდონ საპენსიო სქემის მონაწილეები
როგორ ვებრძოლოთ მოგზაურთა დიარეას
„სიმეტრია პარკი“ მთაწმინდის რაიონში კომერციული ფართის მშენებლობის დასრულებას აანონსებს
ISET-ის ფინანსების სამაგისტრო პროგრამამ CFA ინსტიტუტთან აფილირება მიიღო
„ბიზნეს ოსკარად“ წოდებული „ოქროს ბრენდის“ დაჯილდოებაზე PSP კვლავ N1 ფარმაცევტულ ბრენდად აღიარეს