პაატა დავითაია - რუსეთის გააქტიურებული პოლიტიკა ჩვენს ოკუპირებულ ტერიტორიებთან დაკავშირებით და სეპარატისტთა ლიდერებთან შეხვედრების ინტენსივობა, ქვეყნისთვის ძალიან სახიფათოა
რუსეთის საგარეო საქმეთა მინისტრისა და სეპარატისტთა ლიდერების სოჭში შეხვედრები და მომავალ თანამშრომლობაზე შეთანხმებები ჩვენი ქვეყნის სუვერენიტეტს, საერთაშორისო სამართლის ნორმებს არღვევს და საქართველოს ანექსიის გაფორმებას ისახავს მიზნად, რაზეც რუსეთის ფედერაცია ბოლო თვეებია, განსაკუთრებით აქტიურად მუშაობს , - ამის შესახებ პარტია „ევროპელი დემოკრატების“ თავმჯდომარემ, პაატა დავითაიამ განაცხადა.
როგორც დავითაია აღნიშნავს, გახშირებული შეხვედრები ცხადყოფს, რომ რუსეთი „ჩვენი ქვეყნის ტერიტორიების ანექსიას ამზადებს“.
„სოჭში გამართული შეხვედრები და იქ გაკეთებული განცხადებები ძალიან სახიფათოა და მიმართულია ქართული სახელმწიფოს წინააღმდეგ. რუსეთის გააქტიურებული პოლიტიკა ჩვენს ოკუპირებულ ტერიტორიებთან დაკავშირებით და შეხვედრების ინტენსივობა ცხადყოფს, რომ რუსეთი ამზადებს ჩვენი ტერიტორიების ანექსიას, რაზედაც ძალიან ბევრჯერ გავაფრთხილე ჩვენი ხელისუფლება.
მოვუწოდებ საქართველოს მთავრობას, საგარეო საქმეთა სამინისტროს, გამოიჩინოს მაქსიმალური ყურადღება ამ შეხვედრებთან დაკავშირებით, გააკეთოს მკვეთრი საპროტესტო განცხადებები და პროცესში ჩართვისკენ მოუწოდოს საერთაშორისო პარტნიორებს“,- აცხადებს პაატა დავითაია.
აღნიშნულ ინფორმაციას „ევროპული დემოკრატები“ ავრცელებენ.
