რაღაც ციფრებს, პროცენტებს, რომ იძახდით უმუშევრობაზე, რუსეთის მოქალაქეების საქართველოში დასაქმებას საქართველოს ეკონომიკის მინისტრი თუ ითვლით, უკაცრავად, ეს ჩვენთვის მიუღებელია, - ასე მიმართა „სტრატეგია აღმაშენებლის“ ლიდერმა გიორგი ვაშაძემ „მინისტრის საათის“ ფორმატში მოსმენისას ვიცე პრემიერს, ეკონომიკისა და მდგრადი განვითარების მინისტრს ლევან დავითაშვილს.

ვაშაძემ მინისტრს სტატისტიკის დეპარტამენტის მონაცემები წარუდგინა და აღნიშნულთან დაკავშირებით შესაბამისი კითხვებით მიმართა.

„რა არის დღეს, საქართველოში ნომერ პირველი ეკონომიკური პრობლემა? - უმუშევრობა. შესაბამისად, ეკონომიკის მინისტრისგან სწორედ უმუშევრობასთან დაკავშირებით პასუხები გვჭირდება. ხელში სტატისტიკის დეპარტამენტის მონაცემები მაქვს, 2022 წელს 249 000 ადამიანი იყო უმუშევარი, 2023 წლის პირველ ორ კვარტალში 266 000 ადამიანი, ანუ დაახლოებით, 20 000-ით უმუშევართა რაოდენობა საქართველოში გაიზარდა. თვითდასაქმებული 410 000 ადამიანი გვყავს, რომელთაც დასაქმებულებში ითვლით, მათი შიდა მეურნეობაში გამომუშავება 156 ლარია. 156 ლარი წარმოგიდგენიათ რომ ნორმალური ანაზღაურებაა, ან შემოსავალია? მხოლოდ გასულ წელს საქართველოდან 100 000 ჩვენი მოქალაქე წავიდა, შობადობა, რაც პირდაპირ ეკონომიკასთანაა დაკავშირებული - კატასტროფული მდგომარეობა გვაქვს, 2019 წლის შემდეგ ყოველწლიური შობადობა 7 000-ით შემცირებულია. შესაბამისად, კითხვა ძალიან კონკრეტული მაქვს, ორნიშნად გაიზარდაო, ასე გაიზარდაო, ისე გაიზარდაო, ვისთვის გაიზარდა? სად არის სარგებელი, რომელიც საქართველოს მოქალაქემ უნდა მიიღოს? რაღაც ციფრებს რომ იძახდით, პროცენტებს უმუშევრობაზე, რუსეთის მოქალაქეების საქართველოში დასაქმებას საქართველოს ეკონომიკის მინისტრი თუ ითვლით, უკაცრავად, ეს ჩვენთვის მიუღებელია. გეუბნებით თქვენსავე ციფრებს“, - განაცხადა ვაშაძემ.