მასწავლებლის დღესთან დაკავშირებით „გამარჯვების კოალიციის“ ერთ-ერთმა ლიდერმა, გიორგი ვაშაძემ პედაგოგებთან შეხვედრა გამართა. ინფორმაციას ამის შესახებ „სტრატეგია აღმაშენებელი“ ავრცელებს.

პარტიის ცნობით, შეხვედრის მთავარ საკითხებს განათლების სისტემაში არსებული პრობლემები და პედაგოგების სოციალური მდგომარეობა წარმოადგენდა.

„სტრატეგია აღმაშენებლის” თავმჯდომარის თქმით, თუკი ქვეყანას სურს, ძლიერი და განათლებული მომავალი თაობა ჰყავდეს, მასწავლებლების შესაბამის დონეზე დაფასებაა საჭირო.

შეხვედრის ბოლოს გიორგი ვაშაძემ მასწავლებლებს დამსახურებული ღვაწლისთვის მადლობის სიგელები გადასცა.

„თუ ჩვენ გვინდა, რომ გვყავდეს მომავალი თაობა, რომელიც ცოდნაზე იქნება ორიენტირებული, განათლებული, თვითრეალიზებული, მასწავლებელი უნდა იყოს ქვეყანაში დაფასებული და სწორედ ამაზე ვიმსჯელეთ მასწავლებლებთან. რა უნდა გაკეთდეს იმისთვის, რომ მასწავლებელი იყოს დაფასებული, რომ კარგი ცოდნა მისცეს ახალგაზრდა თაობას, რომ ქვეყანამ შექმნას ცოდნაზე დაფუძნებული ეკონომიკა - ეს არის გასაღები საქართველოს განვითარების“, - განაცხადა ვაშაძემ.