გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრის დირექტორმა თამარ ალადაშვილმა, გარემოსდაცვითი განათლების ხელშეწყობისთვის, 2023 წლის „მწვანე ჯილდო“, მადლობის სიგელი და სამახსოვრო საჩუქარი თბილისის N182 საჯარო სკოლის სამოქალაქო განათლების მასწავლებელ ნანა გოგატიშვილს გადასცა.

ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.

„ჩვენ აქტიურად ვმუშაობთ ქვეყანაში გარემოსდაცვითი და აგრარული განათლების ხელშეწყობისა და ამ მიმართულებით მასწავლებლების კვალიფიკაციის ამაღლების კუთხით. გარემოსდაცვითი ინფორმაციისა და განათლების ცენტრი 2017 წლიდან მონაწილეობს ღონისძიებაში „მასწავლებლის ეროვნული ჯილდო” და, გარემოს დაცვისა და სოფლის მეურნეობის სამინისტროს სახელით, „მწვანე ჯილდოს” გადასცემს იმ პედაგოგს, რომელსაც მნიშვნელოვანი გარემოსდაცვითი აქტივობები აქვს განხორციელებული. მოხარული ვარ, რომ წელს უკვე მეშვიდედ გვეძლევა შესაძლებლობა, მასწავლებლის ეროვნული ჯილდოს თანამონაწილეები და პარტნიორები ვიყოთ“, - აღნიშნა თამარ ალადაშვილმა.

სამინისტროს მიერ გავრცელებული ინფორმაციის მიხედვით, „მასწავლებლის ეროვნული ჯილდო“ საქართველოს განათლებისა და მეცნიერების სამინისტროს კონკურსია, რომელიც ყოველწლიურად 5 ოქტომბერს, მასწავლებლის საერთაშორისო დღეს იმართება. 2023 წელს, კონკურსის ფარგლებში, ქვეყნის საუკეთესო პედაგოგი გორის N8 საჯარო სკოლის ბიოლოგიის მასწავლებელი ნინო ფსუტური გახდა, რომელიც განათლებისა და მეცნიერების მინისტრმა გიორგი ამილახვარმა დააჯილდოვა.