თბილისის სახელმწიფო უნივერსიტეტის სტუდენტებისთვის სწავლის დაწყებისადმი მიძღვნილი წვეულება გაიმართა. ინფორმაციას თბილისის სახელმწიფო უნივერსიტეტი ავრცელებს.

როგორც თსუ-ს მიერ გავრცელებულ ინფორმაციაშია აღნიშნული, ღია ცის ქვეშ შეკრებილ სტუდენტებს თსუ-ს რექტორმა ჯაბა სამუშიამ სიტყვით მიმართა და უნივერსიტეტელობა მიულოცა.

,,ბედნიერი ვარ, რომ ამდენ გაღიმებულ სახეს ვხედავ. როგორც ჩემთვის, ასევე თქვენთვის, თბილისის სახელმწიფო უნივერსიტეტი დიდი მოვლენაა, რომელმაც ქვეყნის უახლესი ისტორია შექმნა. დღეს, თქვენ ხართ ის თაობა, რომელმაც ხვალ ჩვენი ქვეყნის ისტორია უნდა შექმნათ. ჩვენ ყველაფერს გავაკეთებთ, რომ ხარისხიანი, ევროპული განათლება მოგცეთ. სწორედ ასეთი ახალგაზრდები სჭირდებით ქვეყანას. ჩვენ ვამაყობთ თქვენით!”, - განაცხადა ჯაბა სამუშიამ.

ღონისძიების მონაწილე სტუდენტებს მისასალმებელი სიტყვით საქართველოს განათლებისა და მეცნიერების მინისტრმა, გიორგი ამილახვარმაც მიმართა.

,,ჩემო მეგობრებო, თქვენ ხართ საუკეთესო უნივერსიტეტის საუკეთესო სტუდენტები! ყველა პირველკურსელს, უნივერსიტეტელს გილოცავთ დღევანდელ დღეს. იცოდეთ ერთი რამ, რომ უნივერსიტეტელობა არის განსაკუთრებული სტატუსი და მიხარია, რომ დღეს აქ ასეთი ბევრნი ხართ. თბილისის სახელმწიფო უნივერსიტეტს, რომელიც საქართველოს ისტორიას ინახავს და ბევრი ქარტეხილის მომსწრეა, უდიდესი წვლილი აქვს შეტანილი დღევანდელი საზოგადოების ფორმირებაში. ყველაფერს გავაკეთებ, რათა ფართო ასპარეზი შეგიქმნათ თქვენი პოტენციალის რეალიზებისთვის და გქონდეთ საინტერესო, ახალი თავგადასავლებითა და გამოწვევებით სავსე სტუდენტური ცხოვრება..”,- განაცხადა გიორგი ამილახვარმა.

თსუ-ს ცნობით, გასართობ ღონისძიებაში 15000-ამდე სტუდენტი, მათ შორის, 6200-ზე მეტი პირველკურსელი მონაწილეობდა.

სტუდენტურ წვეულებას მუსიკალურად აფორმებდნენ ნიაზ დიასამიძე, Monk, SUMO, Telepopmusik, URU.