200 000-იან რუკასთან დაკავშირებით სკეპტიკური დამოკიდებულება გქონდათ, - ამ სიტყვებით საქართველოს თავდაცვის ყოფილმა მინისტრმა მინდია ჯანელიძემ დავით გარეჯის საქმეზე ერთ-ერთ ბრალდებულს, ივერი მელაშვილს მის მიერ დასმული კითხვის საპასუხოდ სასამართლო პროცესზე მიმართა.

მინდია ჯანელიძე იმ პერიოდში კრიზისების მართვის სამსახურის ყოფილი უფროსი იყო. როგორც მან სასამართლო პროცესზე განაცხადა, ის 2014 წელს, სასულიერო პირის, კირიონის, თავდაცვის სამინისტროს კარტოგრაფებისა და იმჟამინდელი პრემიერ-მინისტრ ირაკლი ღარიბაშვილის შეხვედრას ესწრებოდა, სადაც მას ღარიბაშვილმა აღნიშნული საკითხის შესწავლა დაავალა.

"ამ ფორმატში, ვიდრე სასამართლო პროცესი მიმდინარეობს, დეტალებში არ შევალ...გარკვეული ხარვეზები იყო, რომელიც გამოიკვეთა, შესაბამისი მუშაობა გრძელდებოდა. სასამართლოზე როგორც ბრალდების, ასევე დაცვის მხარის მიერ დაისვა შეკითხვები. ჩემ ხელთ არსებული ინფორმაციის ფარგლებში ამომწურავად გავეცი პასუხი",- განაცხადა ჯანელიძემ.

კითხვაზე, თუ რამდენად იყო ბრალდებულების მხრიდან 200 000-იანი რუკის მოპოვება შესაძლებელი, ჯანელიძემ ასე უპასუხა: „როგორც გითხარით, ასეთ დეტალებზე ასეთ ფორმატში საუბარი ცოტა არასწორია“.

„ამ დეტალებს ბევრი ნიუანსი აქვს, ამიტომ ის ინფორმაცია, რაც მქონდა, სასამართლოს, გამოძიებას მივეცი და არამხოლოდ მე, ყველამ, ვისაც ამასთან შეხება ჰქონდა. შესაბამისად, ეს პროცესი სასამართლოს გადაწყვეტილებით უნდა დასრულდეს“, - განაცხადა ჯანელიძემ.

კითხვაზე, თუ რამდენად მნიშვნელოვანია ეს სისხლის სამართლის საქმე დავით გარეჯის საზღვრის საკითხზე, თავდაცვის ყოფილმა მინისტრმა ასე უპასუხა: „ძალიან მნიშვნელოვანია. რომ ეს საკითხი გაირკვეს ისე, როგორც ეს ჭეშმარიტებაა. ეს საკითხი და ეს პროცესი ძალიან მნიშვნელოვანია“.

ცნობისთვის, გენერალურმა პროკურატურამ სახელმწიფო უსაფრთხოების სამსახურთან ერთობლივი თანამშრომლობის შედეგად საქართველოს საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსი - ივერი მელაშვილი და საქართველოს შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა დააკავა. პროკურატურის ინფორმაციით, ექსპერტიზის დასკვნით დადგინდა, რომ ბრალდებულები საზღვრების დელიმიტაციის პროცესში ხელმძღვანელობდნენ 1970-80-იან წლებში გამოცემულ რუკებზე დატანილი საზღვრის ხაზებით, რაც არსებითად ეწინააღმდეგება ჩვენი ქვეყნის ისტორიულ საზღვარს, მათ შორის დავით გარეჯთან მიმართებაში.

სახელმწიფო ბრალდების ცნობით, ბრალდებულები განზრახ, ზემდგომი პირების დავალებების შესაბამისად მოქმედებდნენ.

ივერი მელაშვილი და ნატალია ილიჩოვა თბილისის საქალაქო სასამართლომ სხდომათა დარბაზიდან გასული 2021 წლის 28 იანვარს გაათავისუფლა. მოსამართლემ ბრალდებულებს აღკვეთის ღონისძიების სახით შეფარდებული პატიმრობა 20 000-20 000-ლარიანი გირაოს სანაცვლოდ შეუცვალა.