მერიის საქალაქო სამსახურმა პროექტში ცვლილებები შესაბამისი ექსპერტიზის დასკვნის გარეშე დაამტკიცა, - ამის შესახებ ვაკის პარკში მომხდარი ტრაგედიის საქმის პროკურორმა არჩილ ტყეშელაშვილმა განაცხადა.

მისივე განმარტებით, დედაქალაქის მერის მოადგილის, ანდრია ბასილაიას სასამართლოში დაკითხვით რამდენიმე დეტალი გამოიკვეთა.

„ჩვენ-ჩვენი შეკითხვებით რამდენიმე საკითხი გამოვკვეთეთ. კერძოდ, დამატებითი პროექტის, რომელიც წარდგენილი იყო მერიის საქალაქო სამსახურში, ხელშეკრულება მოქმედი იყო, შესაბამისად, პროექტის ცვლილებების დროს საჭირო იყო ამ პროექტს ჩატარებოდა დამატებითი ექსპერტიზა. ასეთი ექსპერტიზა არ ჩატარებულა და მერიის საქალაქო სამსახურმა პროექტში ცვლილებები შესაბამისი ექსპერტიზის დასკვნის გარეშე დაამტკიცა. ასევე გამოიკვეთა, რომ ხელშეკრულებაში პირდაპირ არის ჩანაწერი, რომ მიღება-ჩაბარების აქტის გაფორმებისას წარმოდგენილი უნდა იყოს უსაფრთხოების დოკუმენტაცია, დამიწების კონტურის გაზომვის ოქმები და საშემსრულებლო ნახაზი. ამ შემთხვევაში, ეს დოკუმენტები არ ყოფილა წარმოდგენილი.

მერიის თანამშრომლებმა განმარტეს, რომ თითქოს, ეს ეხებოდა გარე განათების ბოძებს, მაგრამ ხელშეკრულებიდანაც და ფაქტობრივად, ჩვენ ვადასტურებთ, რომ ეს ჩანაწერი გარე განათებასაც ეხებოდა და შადრევანსაც, ვინაიდან შადრევანი გაცილებით საფრთხის შემცველი ობიექტია, უფრო მეტი შემხებლობა აქვს მოქალაქეებს აღნიშნულ ობიექტთან. შესაბამისად, უსაფრთხოების დოკუმენტაცია და დამიწების კონტურის გაზომვის ოქმები ამ ობიექტსაც ეხებოდა. ეს დოკუმენტები წარდგენილი რომ ყოფილიყო, ეს მძიმე შედეგი თავიდან იქნებოდა აცილებული“,- განაცხადა ტყეშელაშვილმა.

ცნობისთვის, მერიის გარემოს დაცვის საქალაქო სამსახურის ყოფილ უფროსს, გიგა გიგაშვილს, მას ბრალი სამსახურებრივი გულგრილობის ჩადენის ფაქტზე აქვს წარდგენილი, რამაც ადამიანის სიცოცხლის მოსპობა გამოიწვია. „ექსპერტიზა, მშენებლობა, დიზაინის“ სპეციალისტს ვახტანგ ლონდარიძეს კი, ყალბი ოფიციალური დოკუმენტის დამზადების ადა გამოყენების ფაქტზე აქვს ბრალდება წარდგენილი. ასევე აღნიშნულ სისხლის სამართლის საქმეზე ბრალდება წარედგინა სამ იურიდიულ პირს -“გრინსერვის +”-ს, "ექსპერტიზა, მშენებლობა, დიზაინს“ და ,,მშენექსპერტს“. აღნიშნულის საქმის ფარგლებში ბრალდება კიდევ 9 პირს ჰქონდა წარდგენილი, საიდანაც სასამართლომ 8 პირის მიმართ გამამტყუნებელი განაჩენი გამოიტანა.