“ევროპელი დემოკრატების“ თავმჯდომარე პაატა დავითაია, გენერალური მდივანი მამუკა გამყრელიძე და პოლიტიკური საბჭოს თავმჯდომარე ნიკოლოზ ვაშაკიძე ბრიუსელში, ევროპის საბჭოში და ევროკომისიაში შეხვედრებს მართავენ.

“ევროპელი დემოკრატების“ პრესსამსახურის ცნობით, 18 ოქტომბერს „ევროპელი დემოკრატების“ ლიდერების შეხვედრა გაიმართა გაფართოების საკითხებში ევროკავშირში ირლანდიის მუდმივ წარმომადგენელთან კაროლინა ობიკენთან.

„ევროპელი დემოკრატების“ თავმჯდომარის პაატა დავითაიას განცხადებით, შეხვედრაზე ისაუბრეს ევროკავშირში საქართველოს ინტეგრაციის პერსპექტივაზე და კანდიდატი ქვეყნის სტატუსის მინიჭებასთან დაკავშირებულ პროცესზე.

მათივე ცნობით, „ევროპელი დემოკრატების“ ლიდერების მიერ შეხვედრაზე ხაზგასმით იქნა გამოხატული პოზიცია, რომ საქართველომ აუცილებლად უნდა მიიღოს კანდიდატი ქვეყნის სტატუსი გარკვეული ვალდებულებების დათქმით.

„ძალიან მნიშვნელოვანი და საინტერესო შეხვედრა გვქონდა კაროლინა ობიკენთან. სამუშაო შეხვედრაზე საუბრის ძირითადი თემა იყო საქართველოსთვის კანდიდატი ქვეყნის სტატუსის მინიჭების საკითხი, ასევე, არსებული პოლიტიკური სიტუაცია და გარე საფრთხეები, რაც მომდინარეობს რუსეთის ფედერაციის მხრიდან, ჩვენს ოკუპირებულ ტერიტორიებზე მათ მიერ განხორციელებულ ქმედებებთან, კერძოდ, ოჩამჩირეში სამხედრო საზღვაო ბაზის გახსნასთან დაკავშირებით.

კაროლინ ობიკენს გავაცანით ჩვენი ხედვა იმ საკითხებზე, რაც ძალიან მნიშვნელოვანია კანდიდატი ქვეყნის სტატუსის მინიჭების პროცესში. კაროლინმა გამოხატა მხარდაჭერა საქართველოს ევროკავშირში გაწევრიანების გზაზე, რაც ჩვენი ქვეყნისთვის ამ უმნიშვნელოვანეს პერიოდში განსაკუთრებით ღირებულია“,- აღნიშნა დავითაიამ.

როგორც გავრცელებულ ინფორმაციაშია ნათქვამი, „ევროპელი დემოკრატების“ ლიდერებს, ასევე, დაგეგმილი აქვთ შეხვედრები ევროპის საბჭოს სხვა წარმომადგენლებთან.