თეიმურაზ ჯანაშია - არანაირი დანაშაული არ არის, აქ არის რამდენიმე ადამიანის ახირება, მიხეილ სააკაშვილს მიუსაჯოს გაფლანგვის მუხლი

აქ არ არის არანაირი დანაშაული, აქ არის რამდენიმე ადამიანის ახირება, მიხეილ სააკაშვილს მიუსაჯოს გაფლანგვის მუხლი, - ამის შესახებ დიდი ოდენობით საბიუჯეტო თანხების ჯგუფურად გაფლანგვაში ბრალდებულმა, თეიმურაზ ჯანაშიამ თბილისის საქალაქო სასამართლოში პროცესი დაწყებამდე განაცხადა.

მისივე თქმით, დღეს მოწმის სახით პროცესზე თემურ მღებრიშვილია დაბარებული.

„ზოგადად, ვართ დაცვის მტკიცებულებების გამოკვლევის ეტაპზე. დღეს ჩვენ წარვადგენთ კონკრეტულ მტკიცებულებას, რომლიდანაც ნათლად დაინახავთ, რომ ეს საქმე არის აბსოლუტურად სამართლისგან დაცლილი, შერჩევითი მართლმსაჯულების მაგალითია და კონკრეტული მაღალი თანამდებობის პირები პირდაპირ დავალებებს აძლევენ მიკერძოებულ სასამართლოს, პირდაპირ არღვევენ უდანაშაულობის პრეზუმფციას. გვყავს მოწვეული მოწმე, არ ვიცი გამოცხადდება თუ არა. ეს არის თემურ მღებრიშვილი. ის იყო, ჩემ მერე, სახელმწიფო დაცვის სპეციალური სამსახურის უფროსი და ასრულებდა იგივე განკარგულებებს, რასაც მე, მაშინ, როცა ღარიბაშვილი იყო პრემიერ-მინისტრი. აქ არ არის არანაირი დანაშაული, აქ არის რამდენიმე ადამიანის ახირება, მიხეილ სააკაშვილს მიუსაჯოს გაფლანგვის მუხლი. მოკლედ, რომ ვთქვათ, 2013 გამოცემული განკარგულება იყო 4 მილიონზე. მე ვმუშაობდი თებერვლამდე და დავხარჯე, პირობითად, მესამედი ნაწილი, დანარჩენი დახარჯა ჩუბინიძემ, ზუსტად იგივე სქემით, იგივე განკარგულების საფუძველზე. ამაზე, თითქოს, იგი დაკითხულია. ჩვენ ვიცით, რომ განკარგულებებს გრიფი ადევს და არ ხსნიან. მე როცა ორი საათის განმავლობაში ბრალი გამომიცხვეს და შემრაცხეს დამნაშავედ, ანზორ ჩუბინიძის შემთხვევაში, მე-10 წელია, პროკურატურა ფიქრობს წაუყენოს თუ არა ბრალი. ისევ იქამდე მივდივართ, აქ არ არის დანაშაული, რა თქმა უნდა, არც ანზორ ჩუბინიძეს არაფერი დაუშავებია, ისევე როგორც მე, ოთარ ქველიძეს, არც თემურ მღებრიშვილს. აქ საუბარია იმაზე, რომ ვიღაცის ახირებაა, ვიღაც პასუხისგებაში მიეცეს“, - განაცხადა თემურ ჯანაშიამ.

ცნობისთვის, დიდი ოდენობით საბიუჯეტო თანხების ჯგუფურად გაფლანგვაში ბრალდებულების, ყოფილი პრეზიდენტის, მიხეილ სააკაშვილისა და სახელმწიფო დაცვის სპეციალური სამსახურის ყოფილი უფროსის, თეიმურაზ ჯანაშიას საქმეზე თბილისის საქალაქო სასამართლოში პროცესი მიმდინარეობს. სხდომას დისტანციურად ესწრება მიხეილ სააკაშვილი, ასევე ბრალდებული თეიმურაზ ჯანაშია.

აღნიშნულ საქმეს, რომელსაც საზოგადოება ე.წ. პიჯაკების საქმედ იცნობს. პროკურატურა ბრალდებულებს საბიუჯეტო თანხის დიდი ოდენობით - 9 მილიონი ლარის ჯგუფურად გაფლანგვას ედავება.

ლევან ლორთქიფანიძე - დასავლეთის მკაცრი, მიზანმიმართული გადაწყვეტილებები, ივანიშვილს აგრძნობინებს, რომ მან ადრე ჩამოწერა აშშ და ევროკავშირი, რომ დასავლეთი არ აპირებს ხელი აიღოს თავის ინტერესებზე სამხრეთ კავკასიაში
ქართული პრესის მიმოხილვა 18.07.2024
კავკასიის ტექნოლოგიების სკოლა და კომპანია „პარვუს ჯგუფი“ აბიტურიენტებს და დაინტერესებულ პირებს ენერგეტიკისა და ელექტროინჟინერიის ახალი საბაკალავრო პროგრამის პრეზენტაციაზე იწვევს
კავკასიის მედიცინის ცენტრი JCI აკრედიტებული პირველი მულტიპროფილური რეფერალური ჰოსპიტალი გახდა ქვეყანაში
მეხუთე თაობის „სანტა ფე“ - მზად ნებისმიერი თავგადასავლისთვის