ბრალდების მხარემ პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ბრალდებული ლაზარე გრიგორიადისის დაკითხვა მოითხოვა. იმ შემთხვევაში თუ გრიგორიადისი თანახმა იქნება, ბრალდების მხარე მას დაკითხავს.

ამასთან დაკავშირებით პროკურორი თამარ იაკობიძე აცხადებს, რომ ბრალდების მხარეს ლაზარე გრიგორიადისის გამოკითხვა ფაქტობრივი გარემოების ირგვლივ საკითხებზე სურს.

მისივე თქმით, ბრალდებული ბოლო ორი პროცესია მის მიერ ხელმოწერილ დოკუმენტების ირგვლივ გარკვეულ გარემოებებს ცვლის, შესაბამისად, ბრალდების მხარეს ბევრი კითხვა აქვს როგორც ფაქტობრივ გარემოებებზე, ასევე იმ ტექნიკურ დოკუმენტაციასთან დაკავშირებით, რომელიც მისი მონაწილეობით შედგა და რომელთან დაკავშირებით აქამდე პრეტენზია არ ჰქონია.

ცნობისთვის, ლაზარე გრიგორიადისს, რომელსაც პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ედება ბრალი, აღკვეთის ღონისძიების სახით პატიმრობა 31 მარტს შეეფარდა.

გამოძიების ინფორმაციით, ბრალდებულმა 7 მარტს, რუსთაველის გამზირზე გამართული აქციის მიმდინარეობისას, 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით, რომლებიც სამსახურებრივ მოვალეობას ასრულებდნენ, ორჯერ ისროლა ე.წ. „მოლოტოვის კოქტეილი“.

ასევე, ბრალდებულმა 9 მარტს, ჭანტურიას ქუჩაზე, განზრახ წაუკიდა ცეცხლი შინაგან საქმეთა სამინისტროს კუთვნილ „ტოიოტა კოროლას“ მოდელის ავტომანქანას, რომელიც ადგილზე დაიწვა. ამ ქმედების შედეგად, სახელმწიფო ბიუჯეტს 39 500 ლარის ქონებრივი ზიანი მიადგა.

ლაზარე გრიგორიადისს ბრალდება საქართველოს სისხლის სამართლის კოდექსის 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით) და 187-ე მუხლის მეორე ნაწილის „ა“ ქვეპუნქტით (სხვისი ნივთის განადგურება, ცეცხლის წაკიდებით) წარედგინა, რაც სასჯელის ზომად 7-დან 11 წლამდე თავისუფლების აღკვეთას ითვალისწინებს.

7-8 მარტის საქმეზე სისხლის სამართლის კოდექსით ჯამში, 6 პირი დააკავეს, მათგან 5 ბრალდებული გირაოს სანაცვლოდ არის გათავისუფლებული.