პარლამენტის წინ მოქალაქეთა ჯგუფმა სოფელ კირბალის მიმდებარედ, რუსეთის საოკუპაციო ძალების მიერ საქართველოს მოქალაქის მკვლელობის ფაქტი გააპროტესტა.

მათი შეფასებით, ინციდენტი შედეგია საქართველოს მთავრობის მიერ არ გაღიზიანების პოლიტიკის.

აქციის ერთ-ერთი მონაწილის, ექიმ ვაჟა გაფრინდაშვილის განცხადებით, 4 000-მდე საქართველოს მოქალაქეა დაკავებული რუსი ოკუპანტების მიერ, ხოლო მთავრობა ცდილობს “ფაქტი მიჩუმებული იყოს”.

„წარმოუდგენელია, ამაზე უარესი საქართველოში რა უნდა მოხდეს, როდესაც მოქალაქეს ოკუპანტი იარაღით გიკლავს. 4 000-მდე საქართველოს მოქალაქეა დაკავებული რუსი ოკუპანტების მიერ. სამწუხაროდ, ჩვენი მთავრობა ცდილობს მიჩუმებული იყოს ეს ამბავი. თუ ასე გაგრძელდება, ყველას იგივე გველოდება, არა ე.წ. საოკუპაციო ხაზთან, შეიძლება თბილისშიც იგივე დაგვემართოს”,- განაცხადა გაფრინდაშვილმა.

სოფელ კირბალის მიმდებარედ რუსეთის საოკუპაციო ძალებმა ცეცხლსასროლი იარაღით სროლის შედეგად საქართველოს მოქალაქე მოკლეს. საქართველოს სახელმწიფო უსაფრთხოების სამსახური მომხდარზე განცხადებას ავრცელებს და აცხადებს, რომ რუსეთის საოკუპაციო ძალებმა უკანონოდ დააკავეს საქართველოს კიდევ ერთი მოქალაქე.

“2023 წლის 6 ნოემბერს გორის მუნიციპალიტეტის სოფელ კირბალის მიმდებარედ, ოკუპირებულ ტერიტორიაზე, ადგილობრივი მცხოვრების უკანონოდ დაკავების მცდელობისას რუსეთის საოკუპაციო ძალების მიერ ცეცხლსასროლი იარაღით სროლის შედეგად გარდაიცვალა საქართველოს მოქალაქე და უკანონოდ დაკავებულ იქნა ერთი მოქალაქე.

მიმდინარეობს აქტიური კომუნიკაცია საქართველოს ცენტრალური ხელისუფლების ხელთ არსებული ყველა ინსტრუმენტის გამოყენებით”, - ნათქვამია ინფორმაციაში, რომელსაც სუს-ი ავრცელებს.

შსს-მ გორის მუნიციპალიტეტის სოფელ კირბალთან, რუსეთის საოკუპაციო ძალის წარმომადგენლის მიერ ცეცხლსასროლი იარაღიდან გასროლის შედეგად საქართველოს მოქალაქის მკვლელობის და ერთი პირის გატაცების ფაქტებთან დაკავშირებით გამოძიება სისხლის სამართლის კოდექსის 109-ე და 143-ე მუხლებით დაიწყო, რაც განზრახ მკვლელობას და თავისუფლების უკანონო აღკვეთას გულისხმობს.