ისრაელის ტერიტორიის შენარჩუნება, სუვერენულობა ძალიან მნიშვნელოვანია და ტერორიზმი დაუშვებელია, - ამის შესახებ საქართველოს პრეზიდენტმა სალომე ზურაბიშვილმა France 24-თან მიცემულ ინტერვიუში ახლო აღმოსავლეთში განვითარებულ მოვლენებზე საუბრისას განაცხადა.

კერძოდ, ჟურნალისტის კითხვაზე, მოუწოდებს თუ არა ის ღაზის სექტორში ცეცხლის შეწყვეტისკენ, ზურაბიშვილმა აღნიშნა, რომ ეს მისი როლი არ არის.

„მე არაფრისკენ არ მოვუწოდებ. ეს არ არის ჩემი როლი. მე განადგურებული ვარ მიმდინარე მოვლენებით. ჩვენ საუკუნოვანი სოლიდარობა გვაკავშირებს ისრაელთან და კარგად გვესმის, რომ ისრაელი გრძნობს მუქარას და მისი ტერიტორიის შენარჩუნება სუვერენულობა ძალიან მნიშვნელოვანია, ტერორიზმი დაუშვებელია და ამავდროულად, ჰუმანიტარული მდგომარეობა, რომელსაც დღეს ვხედავთ არის ტრაგიკული, დრამატული და ჩვენ ძალიან კარგად ვიცით რას ნიშნავს დრამატული სიტუაციები და მე არ შემიძლია არ დავინახო ბავშვები…“, - განაცხადა პრეზიდენტმა. ჟურნალისტის რეპლიკაზე: „ღაზაში“?

„…იმ მდგომარეობაში, რაც თქვენ აჩვენეთ. ყოველდღიურად ვხედავთ სიტუაციის დამძიმებას და ვფიქრობ, ყველამ ერთად უნდა იპოვოს გამოსავალი“, - დასძინა პრეზიდენტმა.