პარლამენტმა „წყალმომხმარებელთა ორგანიზაციების შესახებ" კანონში ცვლილების შეტანას - 78 ხმით მხარი დაუჭირა.

საქართველოს პარლამენტის ცნობით, ცვლილებით, 2 წლით გახანგრძლივდება პირველადი წყალმოსარგებლის მიერ წყალმომხმარებელთა ორგანიზაციისთვის/სხვა წყალმოსარგებლისთვის გაწეული მომსახურების ტარიფების დადგენის ვადა. ასევე 2 წლით გახანგრძლივდება რეგულირების საფასურის განსაზღვრისა და ამ საფასურის გადახდის წესის დამტკიცების ვადა.

ამასთან, აღნიშნავენ, რომ მომხსენებლის, გარემოს დაცვისა და სოფლის მეურნეობის მინისტრის პირველი მოადგილის ნინო თანდილაშვილის განცხადებით, სამინისტრო აქტიურად ავითარებს სამელიორაციო სისტემებს რეგიონებში და წელს საერთაშორისო საფინანსო ინსტიტუტების დაფინანსებით დაიწყო 300 მილიონზე მეტი ღირებულების საირიგაციო პროექტები სხვადასხვა რეგიონში, რომელიც საბოლოო ჯამში ხელს შეუწყობს საირიგაციო სისტემების მოდერნიზებას და ინფრასტრუქტურის გაუმჯობესებას.

„პარალელურად მიმდინარეობს წყალმომხმარებელთა ორგანიზაციების ჩამოყალიბების პროცესი იმისათვის, რომ ამ ყველაფერმა სისტემურად კარგად იმუშაოს რეგიონებში. შესაბამისად, საქართველოს მელიორაციას სჭირდება დამატებითი ვადები იმისთვის, რომ განსაზღვრული ტარიფებიდან გამომდინარე სისტემურად გაიმართოს მთლიანად წყალმომხმარებელთა ორგანიზაციების მუშაობა და ამ ყველაფერს მიებას გაწეული მომსახურების ტარიფების სისტემაც. ამისთვის კი, აუცილებელია, რომ ყველგან მოეწყოს შესაბამისი ინდივიდუალური აღრიცხვის კვანძები, განისაზღვროს თითოეული მომხმარებლისთვის მიწოდების წერტილი და გარკვეული ტექნიკური საკითხები გადაწყდეს. ბუნებრივია, ამ ყველაფერზე მუშაობა მომდევნო წლებში აქტიურად გაგრძელდება", - აღნიშნა ნინო თანდილაშვილმა.