იაპონიის საგარეო საქმეთა სამინისტრომ 43 რუსული კომპანიის აქტივების გაყინვის გადაწყვეტილება მიიღო.

რუსული მედიის ინფორმაციით, სანქცირებულ კომპანიებს შორისაა: რუსული საბავშვო და ახალგაზრდული სამხედრო-პატრიოტული საზოგადოებრივი მოძრაობა „იუნარმია“, კომპანია „პატრიოტი“, სააქციო საზოგადოება „195 სარაკეტო და საარტილერიო იარაღის სარემონტო ქარხანა“, რუსეთის კვანტური ცენტრი, ელექტრონული ბრძოლის სამეცნიერო-ტექნიკური ცენტრი და სხვა ორგანიზაციები.

გარდა ამისა, იაპონიამ საექსპორტო შეზღუდვები დაუწესა 57 კომპანიას და ასევე აკრძალა არაინდუსტრიული რუსული ბრილიანტის იმპორტი.

აღსანიშნავია, რომ იაპონიის სანქციების სიაში ამ დროისთვის, საერთო ჯამში, 494 რუსული კომპანია და ორგანიზაციაა შესული.

ამასთან, ტოკიომ რუსეთის 35 მოქალაქის წინააღმდეგ პერსონალური სანქციები დააწესა. მათ შორის არიან სამხედროები, პოლიტიკოსები და ოფიციალური პირები, ასევე რუსეთის მიერ ოკუპირებული უკრაინის ოთხი რეგიონის ე.წ. ხელისუფლების წარმომადგენლები.