ხატია დეკანოიძე - ვენეციის კომისიის დასკვნა ძალიან მძიმეა - თუ კომისია გვეუბნება, რომ ხარვეზია, თავიდან უნდა განვიხილოთ, ანტიკორუფციული ბიუროს კანონმდებლობა გადასაწერია
ვენეციის კომისიის დასკვნა ძალიან მძიმეა, - ამის შესახებ საპარლამენტო პოლიტიკური ჯგუფის „ევროოპტიმისტების” დეპუტატმა, ხატია დეკანოიძემ „პალიტრანიუსის“ გადაცემა „პოლიტიკურ სივრცეში“ განაცხადა.
ხატია დეკანოიძე გამოეხმაურა ვენეციის კომისიის ბოლო დასკვნას, სადაც საუბარია ანტიკორუფციულ ბიუროსთან დაკავშირებულ კანონმდებლობაზე და აცხადებს, რომ კონკურსი, რომელიც ჩატარდა, არ იყო იმ შედეგის მომცემი.
„ანტიკორუფციულ ბიუროზე სრულად ვიზიარებ ვენეციის კომისიის მოსაზრებას და ძალიან მძიმეა ის დასკვნა, რომელიც დევს. კონკურსი, რომელიც ჩატარდა, არ იყო ბოლომდე, გარანტირებულად იმ შედეგის მომცემი, რაც დამოუკიდებელი ანტიკორუფციული ბიუროს უფროსის დანიშვნას გულისხმობდა. მათ შორის ანტიკორუფციული ბიუროს უფროსი არის დანიშნული პრემიერ-მინისტრის მიერ“, - განაცხადა ხატია დეკანოიძემ.
ხატია დეკანოიძის თქმით, ანტიკორუფციული ბიურო ფაქტობრივად არ არსებობს და კანონმდებლობა ხელახლაა გადასაწერი.
„ვენეციის კომისია იძლევა რეკომენდაციას და აფასებს კანონმდებლობას, რომელიც ეხება სახელმწიფო ინსტიტუტებს, არჩევნებს და ა.შ., რაც დემოკრატიას უკავშირდება, რამდენად შესაბამისია იგი ევროპულ დემოკრატიასთან, ევროსაბჭოსთან და ევროკომისიასთან. თუ ჩვენ ვენეციის კომისია გვეუბნება, რომ ეს არის ხარვეზით, თავიდან უნდა განვიხილოთ. გადასაწერია ანტიკორუფციული ბიუროს კანონმდებლობა. ფაქტობრივად არ არსებობს ანტიკორუფციული ბიურო. ჩემი მოსაზრებით ანტიკორუფციული ბიუროს უფროსი უნდა იყოს მაღალი კონსენსუსით დანიშნული. როგორც უკრაინაში მოხდა თავის დროზე. კონკურსი უნდა ჩატარდეს და შეთანხმება უნდა მოხდეს საკონკურსო კომისიის წევრებზე და წესებზე“, - განაცხადა ხატია დეკანოიძემ.
ცნობისთვის, ვენეციის კომისია აცხადებს, რომ არსებული ინსტიტუციური პროექტი არ ითვალისწინებს ანტიკორუფციული ბიუროს დამოუკიდებლობის საკმარის ხარისხს და მიიჩნევს, რომ პოლიტიკური პარტიების დაფინანსების ზედამხედველობისა და მაღალი დონის თანამდებობის პირების ქონებრივი და ინტერესების დეკლარაციების მონიტორინგთან დაკავშირებით მისი კომპეტენციები კანონში დამატებით გარანტიების შეტანას მოითხოვს.
v-if="article.gallery" v-html="article.gallery"
