ზოოპარკის დირექტორის, ზურაბ გურიელიძის განცხადებით, ადამიანების მიერ პიროტექნიკის გამოყენებისას „ზოოპარკში ბოლო 5 წლის განმავლობაში, ორი ცხოველი დაიღუპა“.

როგორც მან მედიაჰოლდინგ „კვირას“ პრესკლუბში პრესკონფერენციაზე განაცხადა, პიროტექნიკის გამოყენება ცხოველებში ქცევის შეცვლას იწვევს.

„მოულოდნელი ხმაური, რომელსაც თან განათება მოჰყვება, ცხოველებისთვის გაუგებარი და აუხსნელია, შესაბამისად, დიდი საფრთხის შემცველია მათთვის. რაც შეეხება, ქცევის შეცვლას, ის სხვადასხვანაირია და ცხოველებზეა დამოკიდებული. ზოგ შემთხვევაში ისინი არიან დამალულები, ზოგ შემთხვევაში იწყებენ სირბილს ყოველგვარი გარკვეული მიმართულების გარეშე. ეს განსაკუთრებით სახიფათოა ისეთი ცხოველებისთვის, როგორებიც არიან ჩლიქოსნები. ისინი დიდი ზომის ცხოველები არიან და დიდი წონაც აქვთ. ხშირ შემთხვევაში, სწორედ ასე ხდება ხოლმე ცხოველების დაზიანება და შეიძლება დაღუპვაც. ეს პრობლემის ერთი გზაა. მეორე არის სტრესი, რომელსაც ცხოველები შეიძლება, რომ სხვადასხვანაირად გამოხატავდნენ. ზოგიერთ შემთხვევაში შეიძლება სხვადასხვა მძიმე დაავადება განვითარდეს. ის შესაძლოა, არა მყისიერად, არამედ რამდენიმე დღეში გამოვლინდეს და ნებისმიერი ჩარევა ასეთ დროს უკვე გვიანი იყოს“, - განაცხადა ზურაბ გურიელიძემ.

ამასთან, ზოოპარკის დირექტორის განცხადებით, ბოლო 5 წლის განმავლობაში პიროტექნიკის გამოყენებისას ზოოპარკში ანტილოპის სახეობის ორი გნუ დაიღუპა.

„ერთი დაიღუპა ინფარქტით და მეორე, სხვა ცხოველებმა გადათელეს შიშის", - განაცხადა გურიელიძემ.