საქართველოს წითელი ჯვრის საზოგადოების მიერ ჩატარდა კვლევა, ძალადობის პრევენცია საქართველოში - კვლევა მიზნად ისახავდა ძალადობის შესახებ ხანდაზმულების, განსაკუთრებით ხანდაზმული ქალების ცნობიერების დონე შეესწავლა,- ამის შესახებ ინფორმაციას საქართველოს წითელი ჯვრის საზოგადოება ავრცელებს.

მათი ცნობით, მიზნების მისაღწევად შემუშავდა შერეული მეთოდოლოგია, რომელიც მოიცავდა მეორადი მონაცემების შეგროვებასა და ანალიზს (სამაგიდო კვლევა) და თვისობრივ კვლევას (დაინტერესებული მხარეების გამოკითხვა და ფოკუს ჯგუფების შეხვედრები).

„კვლევამ ცხადყო, რომ ცნობიერების დონე ძალადობის ნიშნებისა და ხანდაზმულთა უფლებების შესახებ დაბალია ყველა თაობაში. შესაბამისად, გარკვეულ შემთხვევებში არ ხდება ძალადობის ნიშნების გამოვლენა, ხანდაზმული პირები ძალადობას შემთხვევებში ხშირად არ მიმართავენ შესაბამის სამსახურებს, რაც ნიშნავს იმას, რომ ყურადღების მიღმა რჩება გარკვეული შემთხვევები. განსაკუთრებით საყურადღებოა ფსიქოლოგიური ძალადობისა და ფინანსური ექსპლუატაციის შემთხვევები, რომლებიც კვლევის შედეგების მიხედვით ძალადობის ყველაზე გავრცელებული ფორმაა, რომელსაც ხანდაზმული ადამიანები განიცდიან საკუთარ სახლებში. საინტერესო მიგნებაა, რომ ხანდაზმულებს აქვთ სტერეოტიპული მოსაზრებები ასაკთან და გენდერულ როლებთან დაკავშირებით, რაც ზოგ შემთხვევაში შესაძლოა ასოცირდებოდეს ძალადობის მომატებულ რისკთან.

შინ მოვლის პროექტის ფარგლებში საქართველოს წითელი ჯვრის საზოგადოება აწარმოებს ცნობიერების ამაღლების კამპანიას, რომლის მიზანია ხანდაზმულ ქალთა მიმართ ძალადობის საკითხებზე საზოგადოების ცნობიერების ამაღლების გზით ძალადობის პრევენციის ხელშეწყობა“,- ნათქვამია ინფორმაციაში.