იაპონური გადამზიდი კომპანია Nippon Yusen-ი „ჰუსიტების“ თავდასხმების გამო წითელ ზღვაში მიმოსვლას აჩერებს.

ამის შესახებ ინფორმაციას იაპონური გადამზიდი კომპანიის წარმომადგენელი ავრცელებს.

„ჩვენ, ყველა გემით, რომლითაც ჩვენ ვსაქმიანობთ, წითელ ზღვაში ნავიგაცია შევაჩერეთ“, - განაცხადა Nippon Yusen-ის წარმომადგენელმა.

იაპონური გადამზიდი კომპანიის სპიკერმა განაცხადა, რომ წითელ ზღვაში გემების მიმოსვლის შეჩერების შესახებ გადაწყვეტილება ეკიპაჟის უსაფრთხოების უზრუნველსაყოფად მიიღეს.

იაპონური მედიის ცნობით, გუშინ, კიდევ ორმა იაპონურმა გადამზიდმა კომპანიამ, Kawasaki Kisen-მა და Mitsui O.S.K.-მა წითელ ზღვაში გადაადგილება შეაჩერა.