ირაკლი ღარიბაშვილი გადავიდა პარტიის თავმჯდომარის თანამდებობაზე, თუმცა მის გამოსვლაში იგრძნობოდა, რომ ის უფრო ემშვიდობებოდა საზოგადოებას , - ამის შესახებ ორგანიზაცია "პროგრესული ფორუმის" თავმჯდომარემ, დიმიტრი ცქიტიშვილმა „პლიტრანიუსის“ გადაცემა „რეზიუმეში“ განაცხადა.

დიმიტრი ცქიტიშვილის განმარტებით, პრემიერ-მინისტრის გადადგომა პროცესის დასაწყისია და ეს ყველაფერი აჩვენებს, რომ „ქართულ ოცნებაში, საკმაოდ რთული ვითარებაა.

„გადაადგილებები, რომელიც ივანიშვილის დაბრუნებას მოჰყვა, სავარაუდოდ, უნდა ემსახურებოდეს იმას, რომ საარჩევნოდ გაიძლიერონ პოზიციები სხვადასხვა მიმართულებით, როგორც ქვეყნის შიგნით, ისე ქვეყნის გარეთ. მე სხვა ახსნას ვერ ვხედავ, იმიტომ, რომ არ მგონია, ღარიბაშვილს რაიმე ტაქტიკური ან სტრატეგიული შეცდომა ჰქონოდა დაშვებული ან ისეთი შეცდომა ჰქონდა, რომელიც არ იყო შეთანხმებული გუნდთან. მე ვფიქრობ, რომ საკმაოდ სინქრონულად მუშაობდნენ ბევრ საკითხში, დამოუკიდებლად დიდად ვერ იღებდა გადაწყვეტილებებს. „ოცნების“ გადმოსახედიდან განსაკუთრებულ მიზეზს ვერ ვხედავ, რატომ შეიძლება ის წასულიყო.

ირაკლი ღარიბაშვილი გადავიდა პარტიის თავმჯდომარის თანამდებობაზე, თუმცა მის გამოსვლაში იგრძნობოდა, რომ ის უფრო ემშვიდობებოდა საზოგადოებას, ვიდრე ახალ გეგმებზე საუბრობდა. მე ვფიქრობ, რომ ნომინალურად იქნება წარდგენილი თავმჯდომარის თანამდებობაზე, მაგრამ მან არ ისაუბრა, განსაკუთრებული აქცენტები თავის სამომავლო გეგმებზე არ ისაუბრა. პარტია და არჩევნები ახსენა, მაგრამ არ განმატა განწყობები ვერ დავინახე მის გამოსვლაში, რომ მართლაც რაღაც დიდი, ამბიციური გეგმებია. ალბათ, აირჩევენ თავმჯდომარედ, მაგრამ მისი გამოსვლა დღეს ჰგავდა დამშვიდობებას“, - განაცხადა დიმიტრი ცქიტიშვილმა.