გაერო-ს პალესტინელ ლტოლვილთა დახმარების სააგენტომ ლეგიტიმაცია დაკარგა. ამის შესახებ ისრაელის თავდაცვის მინისტრმა, იოავ გალანტმა გაერო-ს ელჩების დელეგაციასთან შეხვედრისას განაცხადა.

„მთელი მსოფლიოს ქვეყნებიდან გამოყოფილი თანხები პალესტინელ ლტოლვილთა დახმარების სააგენტოს მეშვეობით ტერორისტული ინფრასტრუქტურის გასაძლიერებლად და ტერორიზმის დასაფინანსებლად გამოიყენებოდა“, - განაცხადა იოავ გალანტმა.

იოავ გალანტმა გაერო-ს ელჩებს განუცხადა, რომ ისრაელის თავდაცვის ძალები სამხედრო მოქმედებებს იქამდე გააგრძელებს, ვიდრე თავის მიზნებს არ მიაღწევს.

შეგახსენებთ, გასულ კვირას, ისრაელმა გაავრცელა ინფორმაცია, რომ გაერო-ს პალესტინელ ლტოლვილთა სააგენტოს 12 თანამშრომელი „ჰამასის“ 7 ოქტომბრის თავდასხმაში მონაწილეობდა.

მოგვიანებით, რამდენიმე სახელმწიფომ, მათ შორის: აშშ-მა, იტალიამ, საფრანგეთმა, გერმანიამ და დიდმა ბრიტანეთმა სააგენტოს დაფინანსება შეუჩერეს. გაერო-ს პალესტინელ ლტოლვილთა სააგენტომ განაცხადა, რომ ამ საკითხზე შესაბამისი გამოძიება დაიწყო.