ბევრჯერ დაისვა კითხვები მოქალაქეების რეგისტრაციასთან და უბნებთან დაკავშირებით. ეს მგონია, რომ პოლიტიკური სპეკულაციაა ჩვენი ოპონენტების მხრიდან, - ამის შესახებ საგარეო საქმეთა მინისტრობის კანდიდატმა ილია დარჩიაშვილმა 3 კომიტეტის გაერთიანებულ სხდომაზე ემიგრანტების მიერ ხმის მიცემასთან დაკავშირებით ოპოზიციონერი დეპუტატების კითხვის საპასუხოდ განაცხადა.

მინისტრობის კანდიდატის განცხადებით, მას არ ჰგონია, რომ ამ სპეკულაციებით ოპოზიციის წარმომადგენლებმა „პოლიტიკური ქულები დაიწერონ“.

„ბევრჯერ დაისვა კითხვები მოქალაქეების რეგისტრაციასთან და უბნებთან დაკავშირებით. ეს მგონია, რომ პოლიტიკური სპეკულაციაა ჩვენი ოპონენტების მხრიდან. უბნები გაიხსნება კანონით დადგენილი წესით, იმ პროცედურის შესაბამისად, როგორც მანამდე ხდებოდა. შესაბამისად, აქ პოლიტიკური სპეკულაციების ადგილი არ არის. უბნები გაიხსნება კოორდინირებულად ცენტრალურ საარჩევნო კომისიასთან ერთად, კანონის დადგენილი ვადით და რაც ძალიან მნიშვნელოვანია, მოქალაქეები, რომლებსაც აქვთ სურვილი, რომ ხმა მისცენ, ამისთვის საკონსულო აღრიცხვაზე აყვანის დადგენილი პროცედურა არსებობს. ჩვენ, თითოეული დიპლომატი, მაქსიმალურად და ინტენსიურად ვიმუშავებთ, რომ ისინი დადგნენ აღრიცხვაზე და გამოხატონ კონსტიტუციით მინიჭებული უფლება. შესაბამისად, კიდევ ერთხელ მინდა ვთქვა, რომ ჩემთვის გაუგებარია ეს პოლიტიკური სპეკულაციები. არა მგონია, რომ რაიმე პოლიტიკური ქულები მოიტანოს. ჩვენ კანონით დადგენილი წესით ვმოქმედებთ.

დისტანციური ხმის მიცემა საქართველოში რისკებთან არის დაკავშირებული. ამაზე ვისაუბრეთ და ასევე, მინდა, ჩვენს ოპონენტებს შევახსენო, რომ საქართველოში დისტანციურად ხმის მიცემა დაკავშირებულია რისკებთან, მითუმეტეს უზარმაზარ რისკებთან იქნება დაკავშირებული საზღვარგარეთ ამ რისკების გადაზღვევა და პრევენცია. შესაბამისად, არც აქ არის არანაირი ლოგიკა ვისაუბროთ საზღვარგარეთ, დისტანციურად ხმის მიცემის მნიშვნელობაზე და გადაწყვეტაზე“,- განაცხადა დარჩიაშვილმა.