აირჩევენ პარტნიორობის გზას? - მზად ვართ, შევხვდეთ. აირჩევენ კონკურენციის გზას? - მზად ვართ, შევხვდეთ, - ამის შესახებ “სტრატეგია აღმაშენებლის” დეპუტატმა, პაატა მანჯგალაძემ განაცხადა, რითაც გამოეხმაურა ნიკა გვარამიასა და ნიკა მელიას გაერთიანებას.

მისივე თქმით, ისინი ითანამშრომლებენ ყველასთან, "გარდა რუსებისა და “ქართული ოცნებისა”.

„არსად არ წასულა მიხეილ სააკაშვილის, გიორგი ვაშაძის, ლევან ხაბეიშვილის შეთავაზება, რომ ჩვენ ერთიანობისკენ ვართ მოწოდებული. ახლა ყველაფერი დამოკიდებულია ოპოზიციაში ჩვენს პარტნიორებზე. აირჩევენ პარტნიორობის გზას? - მზად ვართ, შევხვდეთ. აირჩევენ კონკურენციის გზას? - მზად ვართ, შევხვდეთ. ეს იმიტომ უნდა გავაკეთოთ, რომ საქართველოს მოქალაქის დაკვეთაა, მისი საკითხი გახდეს დღის წესრიგის N1 საკითხი, ამიტომ ჩვენ ყველას ვაიძულებთ, რომ ამ პოლიტიკურ დისკუსიაში ჩავითრიოთ ხელისუფლებაც და ოპოზიციაც და თქვენ ნახავთ, 1 თვის შემდეგ ყველა ისაუბრებს საწვავის ფასზე, მაღალ ფასებზე, გლეხის გასაჭირზე, მოქალაქის ტკივილზე და ა.შ.

ჩვენ ვითანამშრომლებთ ყველასთან გარდა რუსებისა და „ქართული ოცნებისა“. უფრო კარგი თანამშრომლობის პლატფორმა შეიქმნება არჩევნების შემდეგ იმ მანდატით და პირობებით, როგორც ხალხი გადაწყვეტს. თუ ქართველი ხალხი გადაწყვეტს, რომ ამ და სხვა პარტიებმა 5%-ზე მეტი მიიღონ, ჩვენ გვინდა თუ არ გვინდა თანამშრომლობა მოგვიწევს“, - აღნიშნა მანჯგალაძემ.

ამასთან, პაატა მანჯგალაძემ უპასუხა კითხვას, რომელი უფრო „ნაციონალური მოძრაობაა”, „გამარჯვების პლატფორმა“ თუ პარტია „ახალი“ და აღნიშნა, რომ „მიხეილ სააკაშვილზე უფრო მიხეილ სააკაშვილი ვერავინ ვერ გახდება“.

„ცნობილი გამოთქმით გიპასუხებთ, „ვერავინ გახდება რომის პაპზე უფრო კათოლიკე”. მგონი გასაგებია, რომ მიხეილ სააკაშვილზე უფრო მიხეილ სააკაშვილი ვერავინ ვერ გახდება“, - განაცხადა მანჯგალაძემ.

ცნობისთვის, ნიკა მელია და ნიკა გვარამია გაერთიანდნენ. მათი გაერთიანების სახელწოდებაა "ახალი", ხოლო არჩევნებში მონაწილეობას საარჩევნო ნომერი 4-ით მიიღებენ.