გაერთიანებული სამეფოს თავდაცვის მინისტრის, გრანტ შაპსის განცხადებით, გერმანიას მნიშვნელოვანი წვლილი მიუძღვის უკრაინის დახმარებაში, მაგრამ კარგი იქნება, რომ ბერლინმა Taurus-ის შორ მანძილზე მოქმედი რაკეტების გადაცემა გადაწყვიტოს.

„მინდა, დავეხმარო გერმანიას შორ მანძილზე მოქმედი Taurus-ის რაკეტების უკრაინისთვის მიწოდებაში. რა თქმა უნდა, აბსოლუტური აზრი აქვს მათ მარაგში ქონას ომის დროს, რომელიც ახლა მიმდინარეობს კონტინენტურ ევროპაში დიქტატორის წინააღმდეგ, რომელმაც დაიპყრო დემოკრატიული ქვეყანა. რას ველოდებით მეგობრებო?“, - აღნიშნა შაპსმა.

მისი თქმით, უკრაინის პრეზიდენტმა, ვოლოდიმირ ზელენსკიმ ბრიტანულ დელეგაციას განუცხადა, რომ გერმანიის კანცლერ ოლაფ შოლცისგან Taurus-ის რაკეტების გადაცემაზე კატეგორიული უარი მიიღო.

შეგახსენებთ, ოლაფ შოლცმა უკრაინისთვის Taurus-ის გადაცემაზე უარის თქმის არაერთი მიზეზი დაასახელა, მათ შორის კონფლიქტის ესკალაციისა და რუსეთთან ომში ჩათრევის შიში და უკრაინის მიერ რაკეტებით მოსკოვის ტერიტორიაზე დარტყმის შესაძლებლობა.