ნატოს-სთვის საქართველო არის ძალიან მნიშვნელოვანი, ღირებული პარტნიორი ჩვენ რეგიონში - როგორც ალიანსი, ისე, ბატონი სტოლტენბერგიც ყოველთვის გამოირჩევა ძალიან მნიშვნელოვანი განცხადებებით ჩვენი ქვეყნის მხარდასაჭერად, - ამის შესახებ საქართველოს საგარეო საქმეთა მინისტრმა, ილია დარჩიაშვილმა ჟურნალისტებს თბილისის აეროპორტში, ნატო-ს გენერალური მდივნის იენს სტოლტენბერგის ჩამოსვლამდე განუცხადა.

მისი თქმით, სტოლტენბერგის ვიზიტი საქართველოში მნიშვნელოვანია და ნატო-სთან თანამშრომლობის დინამიკა გაგრძელდება.

„დღეს, ძალიან მნიშვნელოვანი დღეა, საქართველოში ჩამობრძანდება ნატო-ს გენერალური მდივანი. ეს ბოლო 10 წლის განმავლობაში მისი მეოთხე ვიზიტია საქართველოში. როგორც ვიცით, საქართველოს პრემიერ-მინისტრი მისი პირველი ვიზიტით გაემგზავრა ბრიუსელში, მას ერთის, მხრივ ჰქონდა ევროინტეგრაციის მიმართულებით ასოცირების საბჭოში მონაწილეობის შესაძლებლობა, ხოლო მეორე, შეხვედრა მან გამართა ნატო-ს შტაბბინაში გენერალურ მდივანთან, ასევე, გაიმართა ნატო-საქართველოს კომისია და სწორედ უკვე დღეს, გენერალური მდივნის საქართველოში ჩამობრძანება ნიშნავს ჩვენ ორმხრივ ურთიერთობებში ძალიან კარგ და მნიშვნელოვან, უმაღლეს დონეზე განვითარებულ დინამიკას. ნატოს-სთვის საქართველო არის ძალიან მნიშვნელოვანი, ღირებული პარტნიორი ჩვენ რეგიონში. ჩვენ გვაქვს ძალიან მჭიდრო თანამშრომლობა. ევროატლანტიკური ინტეგრაცია არის ჩვენი კონსტიტუციური ნორმა, საგარეო პოლიტიკური პრიორიტეტის ერთ-ერთი მთავარი ქვაკუთხედი, შესაბამისად, ჩვენ ვაგრძელებთ ძალიან მჭიდრო კოორდინაციას ჩვენ ნატო-ელ პარტნიორებთან ინდივიდუალურად, ორმხრივ ფორმატებში და ალიანსთან, რა თქმა უნდა, ასევე ორმხრივ ფორმატში ნატო-საქართველოს თანამშრომლობის ფარგლებში. ეს დინამიკა გაგრძელდება. ჩვენ ძალიან მადლიერი ვართ ალიანსის, იმისა, რომ ჩვენ ყოველთვის გვქონდა, გვაქვს და გვექნება ძალიან მჭიდრო და ცალსახა მხარდაჭერა, როდესაც საკითხი ეხება ჩვენი ქვეყნის ტერიტორიულ მთლიანობას და სუვერენიტეტს. როგორც ალიანსი, ისე, ბატონი სტოლტენბერგიც ყოველთვის გამოირჩევა ძალიან მნიშვნელოვანი განცხადებებით ჩვენი ქვეყნის მხარდასაჭერად. ჩვენ გვაქვს ასევე ძალიან მჭიდრო კოორდინაცია საქართველოში რეფორმების განხორციელების თვალსაზრისით და ვფიქრობ, რომ ეს ვიზიტი ცალსახად მოიტანს ძალიან მნიშვნელოვან ახალ იმპულსს ჩვენ ორმხრივ ურთიერთობებში. ჩვენ გავაგრძელებთ ამ ძალიან მჭიდრო კოორდინაციას და თანამშრომლობას ალიანსთან”, - განაცხადა ილია დარჩიშვილმა.

ნატო-ს გენერალური მდივანი, იენს სტოლტენბერგი უკვე თბილისშია. ვიზიტის ფარგლებში ის პრემიერ-მინისტრ ირაკლი კობახიძეს და პრეზიდენტ სალომე ზურაბიშვილს შეხვდება.

შეგახსენებთ, ნატო-ს გენერალური მდივანი საქართველოში ბოლოს 2019 იმყოფებოდა.