დღეს, „გამარჯვების კოალიციის“ ფარგლებში, საპარლამენტო ფრაქცია „ერთიანი ნაციონალური მოძრაობის“ თავმჯდომარე თინა ბოკუჩავა და „სტრატეგია აღმაშენებლის“ პოლიტსაბჭოს წევრი ნანა ტოხვაძე, სიღნაღში, სოფელ საქობოში ჩავიდნენ, იქ მცხოვრებ ერთ-ერთ ოჯახს შეხვდნენ და ემიგრაციასთან დაკავშირებულ პრობლემებზე ისაუბრეს.

თინა ბოკუჩავას განცხადებით, მოსახლეობის ნაწილი იძულებულია, ქვეყნიდან წავიდეს.

„რამდენი ოჯახია, რომელიც, აი, ასე გახლეჩილია და უწევთ ქვეყნიდან წასვლა. რატომ?! იმიტომ, რომ აქ არ არის სამუშაო ადგილები, ფასები იზრდება, კატასტროფულად იზრდება! არც საკვებ პროდუქტზე აღარ ყოფნის ოჯახს ფული, არც მედიკამენტზე, საწვავზე საერთოდ საუბარი არ მაქვს. ამიტომ იძულებულია ამდენი ოჯახი ასე გაიხლიჩოს“, - განაცხადა თინა ბოკუჩავამ, რომლის კომენტარსაც „ერთიანი ნაციონალური მოძრაობა“ ავრცელებს.