რა გააკეთა „ქართულმა ოცნებამ“? - პრეზიდენტი „ჩახსნეს“, ოპოზიციის როლი ნულამდე დაიყვანეს, - ამის შესახებ „ევროოპტიმისტების“ წევრმა, პარლამენტის ოპოზიციონერმა დეპუტატმა რომან გოცირიძემ „პალიტრანიუსის“ გადაცემა „360 გრადუსში“ „საარჩევნო კოდექსში“ შეტანილ ცვლილებებსა და ცესკოს ფორმირების წესზე საუბრისას განაცხადა.

რომან გოცირიძის თქმით, მთავრობა ევროკავშირს ეუბნება, რომ მათთვის პრიორიტეტული არ არის რეკომენდაციების შესრულება, რაც ძალაუფლების შენარჩუნებაში ხელს შეუშლის.

„გვეუბნებიან, რომ იმაზე უკეთესი ცვლილებები უნდა განახორციელოთ, ვიდრე დღევანდელი ქართული კანონმდებლობაა. რა გააკეთა „ქართულმა ოცნებამ“? - დღევანდელი მდგომარეობა სანატრელი გაგვიხდა. სამი დღის შემდეგ ეს ვითარება აღარ იქნება, გაქრება, პარლამენტი ვეტოს, რა თქმა უნდა, დაძლევს.

დღეს ცესკო-ს თავმჯდომარეს, პატიოსანი კონკურსის საფუძველზე, პრეზიდენტი არჩევს და პარლამენტს წარუდგენს. პრეზიდენტს ექსკლუზიური უფლება აქვს, რაღაც უფლება გვქონდა ჩვენც, ოპოზიციას - 90 ხმით დაგვემტკიცებინა ცესკო-ს თავმჯდომარე. ასევე, ჩვენ, ოპოზიციას გვყავდა ერთი მოადგილე. ახლა რა ხდება? - პრეზიდენტი ჩახსნეს, ოპოზიციის როლი ნულამდე დაიყვანეს, 76 ხმით ამტკიცებენ ყველაფერს. მოადგილის პოსტიც გააუქმეს. თანაც ისეთ არგუმენტებს ამბობენ, რომ შეურაცხყოფას აყენებენ ამომრჩეველს. ხალხი ცხვრები და უტვინოები ჰგონიათ. ამბობენ: „წარმოგიდგენიათ ცესკო-ს თავმჯდომარე რომ მოკვდეს, რაღაც მოუვიდეს, არჩევნები ოპოზიციის წარმომადგენელმა უნდა ჩაატაროს?“. სულელური არგუმენტია, ცესკო-ს თავმჯდომარეს ჰყავს უმრავლესობიდან მოადგილე და არჩევნები ოპოზიციის წარმომადგენელმა რატომ უნდა ჩაატაროს? მოადგილეც გაგვიუქმეს, 90 ხმაც ჩამოგვართვეს, პრეზიდენტიც განზე გაწიეს და ამ კანონს უკვე სამ დღეში მსვლელობა მიეცემა.

რას ვეუბნებით ვენეციის კომისიას, რომელიც ევროკავშირის მთავარი იურიდიული მრჩეველია. რას ვეუბნებით ევროკავშირს? - მთავრობა ევროკავშირს ეუბნება, რომ ჩემთვის პრიორიტეტული არ არის ისეთი რეკომენდაციების შესრულება, რომელიც ძალაუფლების შენარჩუნებაში ხელს შემიშლის. ივანიშვილის ხელისუფლებისთვის მთავარია ძალაუფლების ბერკეტების არ დათმობა, არა ქვეყანაზე ზრუნვა და ევროკავშირში გაწევრიანება“, - განაცხადა რომან გოცირიძემ.