ევროკავშირისგან 1 მილიონი ევროს დაფინანსებით, ბიზნესისა და ტექნოლოგიების უნივერსიტეტი ქალთა გაძლიერების პროექტს იწყებს. პროექტის „ქალების მენტორობა ტექ პროგრამებში“ ფარგლებში სამ ნაკადად 1100 ბენეფიციარი გადამზადდება. მასში 320 მენტორი ჩაერთვება.

მენტორობის სესიები ხუთ სხვადასხვა ტექნოლოგიურ მოდულში გაიმართება. ესენია: კიბერუსაფრთხოება, Front-end დეველოპმენტი, გრაფიკული დიზაინი, ციფრული მარკეტინგი და UX/UI დიზაინი.

ევროკავშირის მხარდაჭერილი და დაფინანსებული პროექტის ფარგლებში დაგეგმილია ქალების გაძლიერება და განვითარება ტექნოლოგიურ სექტორში. პროექტი გულისხმობს ინტენსიური მენტორობის პროგრამების განხორციელებას, ინდუსტრიის საჭიროებებზე მორგებული ახალი კურსების შემუშავებას და დაინტერესებულ მხარეებთან პარტნიორობას, რათა შექმნან მეტი შესაძლებლობები ქალებისთვის სწრაფად მზარდი ტექნოლოგიების სფეროში. პროექტის ფარგლებში ბენეფიციარებს დამატებით ჩაუტარდებათ კარიერული განვითარებისა და სამეწარმეო უნარების გაუმჯობესებისკენ მიმართული სესიები.

პროექტი განხორციელდება წამყვანი ლიეტუვური ქალთა გაძლიერების ორგანიზაციის Women Go Tech მხარდაჭერითა და ჩართულობით.

პროექტის ბენეფიციარების შერჩევა ახლო მომავალში დაიწყება. აღსანიშნავია, რომ მათი ერთი მესამედი დედაქალაქის გარეთ, საქართველოს სხვადასხვა რეგიონიდან შეირჩევა.

(R)