საქართველო უნიკალური ქვეყანაა, სადაც ქართველი და აზერბაიჯანელი, შიიტი და სუნიტი მუსლიმები ერთსა და იმავე მეჩეთში ლოცულობენ. ჩვენთვის ძალიან ძვირფასია მშვიდობიანი თანაცხოვრების, ძმობის ეს ტრადიცია და ამას საქმითაც ვამტკიცებთ,- ამის შესახებ საქართველოს პრემიერ-მინისტრმა, ირაკლი კობახიძემ საქართველოს მთავრობის სახელით, რამადან ბაირამთან დაკავშირებით გამართულ ტრადიციულ იფტარზე განაცხადა.

პრემიერ-მინისტრმა მუსლიმი თემის წარმომადგენლებს რამადანის თვე მიულოცა და განსაკუთრებულად აღნიშნა საქართველოში ქრისტიანთა და მუსლიმთა მშვიდობიანი თანაარსებობის, მეგობრობის მრავალსაუკუნოვანი ტრადიცია და წვლილი, მუსლიმ მოქალაქეებს ქვეყნის აღმშენებლობაში რომ შეაქვთ.

„საქართველო უნიკალური ქვეყანაა, სადაც ქართველი და აზერბაიჯანელი, შიიტი და სუნიტი მუსლიმები ერთსა და იმავე მეჩეთში ლოცულობენ. ჩვენთვის ძალიან ძვირფასია მშვიდობიანი თანაცხოვრების, ძმობის ეს ტრადიცია და ამას საქმითაც ვამტკიცებთ. სახელმწიფომ მუსლიმ თემს დღემდე გადასცა 237 მეჩეთი, გადასაცემად გამზადებულია კიდევ 20. სახელმწიფომ მუსლიმ თემს დაფინანსება გაუზარდა 4 150 000 ლარამდე და ეკონომიკური ზრდის კვალდაკვალ, ეს მხარდაჭერა კიდევ უფრო მეტად გაიზრდება. საქართველოს რელიგიური მრავალფეროვნება ჩვენი ქვეყნის ერთ-ერთი უმთავრესი სიმდიდრეა“,- აღნიშნა პრემიერმა.

რელიგიის საკითხთა სახელმწიფო სააგენტოს ცნობით, თავმჯდომარემ, ზაზა ვაშაყმაძემ, ხაზი გაუსვა საქართველოს მთავრობის დამოკიდებულებას, მხარდაჭერას მუსლიმი თემისადმი და თავად საქართველოს მუსლიმი თემის უნიკალურობას. მუსლიმ თემს სიტყვით მიმართეს საქართველოს მუსლიმთა შეიხმა ფაიგ ნაბიევმა, დასავლეთ საქართველოს მუფთმა ადამ შანთაძემ და აღმოსავლეთ საქართველოს მუფთმა ეტიბარ ემინოვმა. ღონისძიებას დაესწრნენ საქართველოს სახელმწიფო მინისტრი შერიგებისა და სამოქალაქო თანასწორობის საკითხებში, თეა ახვლედიანი, დიპლომატიური კორპუსის წარმომადგენლები, საქართველოს მუსლიმთა სამმართველოს წარმომადგენლები, რელიგიის საკითხთა სახელმწიფო სააგენტოს თანამშრომლები. დასასრულს, შეხვედრის მონაწილეებმა სამახსოვრო ფოტოები გადაიღეს.