ეკა გიგაურმა სამიზნე მოუნიშნა ახლა თავის დონორებს, რომ ამ სამიზნეზე კარგად დამიზნებით ზუსტად გაარტყან ჩვენს ქვეყანას, – ასე გამოეხმაურა საქართველოს პარლამენტის თავმჯდომარე შალვა პაპუაშვილი „საერთაშორისო გამჭვირვალობა – საქართველოს“ აღმასრულებელი დირექტორის, ეკა გიგაურის განცხადებას - რომ „დასავლეთი უნდა დადგეს საქართველოს გვერდით, თუნდაც სანქციების გამოყენებით, რათა დაიცვას დემოკრატია რეგიონში“.

როგორც მან აღნიშნა, სწორედ, ეს ხალხი, ითხოვს სანქციებს საქართველოსთვის და მათ არანაირი პატრიოტული დამოკიდებულება საკუთარი ქვეყნის მიმართ არ აქვთ.

„ამ განცხადებაშიც კარგად ჩანს ის ყველაფერი, თუ რა დამოკიდებულება აქვს რამდენიმე მილიონერ „ენჯეოს“ წარმომადგენელს თავისი ქვეყნის მიმართ. ეს ხალხი იყო ზუსტად, ვინც ამბობდა, რომ არ უნდა მოეცათ კანდიდატის სტატუსი, ეს ხალხია, რომლებიც ახლა ითხოვენ სანქციებს საქართველოსთვის. არანაირი პატრიოტული დამოკიდებულება საკუთარი ქვეყნის მიმართ არ აქვთ. ამაში არაფერი გასაკვირი არ არის. დიდი ხანია, ცნობილია რამდენიმე „ენჯეო“, რომლებიც პირდაპირ მუშაობენ ქართველი ხალხის წინააღმდეგ. ამ შემთხვევაში, სამიზნე მოუნიშნა ახლა თავის დონორებს, რომ ამ სამიზნეზე კარგად დამიზნებით ზუსტად გაარტყან ჩვენს ქვეყანას“, – განაცხადა შალვა პაპუაშვილმა.