ყოჩაღ, ბატონო ანრი! საკუთარ თავს აჯობეთ დღეს ტრიბუნიდან და დაგაწინაურებენ, აუცილებლად დაგაყენებენ მომავალში ივანიშვილის გვერდით , - ასე მიმართა „ნაციონალური მოძრაობის“ დეპუტატმა ანა წითლიძემ პარლამენტის პლენარულ სხდომაზე „ქართული ოცნების“ წევრს, იურიდიულ საკითხთა კომიტეტის თავმჯდომარეს, ანრი ოხანაშვილს, რომელიც „უცხოური გავლენის გამჭვირვალობის შესახებ“ კანონპროექტს მეორე მოსმენით წარადგენს.

წითლიძემ ოხანაშვილის მისამართით თქვა, რომ 12 წელია ხელისუფლებაშია და კიდევ ვერ დაიმახსოვრა, რომ წარსულზე არ უნდა ისაუბროს.

„ყოჩაღ, ბატონო ანრი! საკუთარ თავს აჯობეთ დღეს ტრიბუნიდან და დაგაწინაურებენ. აუცილებლად დაგაყენებენ მომავალში ივანიშვილის გვერდით. აი, ყოჩაღ! იმის გვერდით [დაგაყენებენ] ვის დავალებასაც ახლა ასრულებთ და ვისაც თავს აწონებთ აი, ამ რიტორიკით. 12 წელია ხელისუფლებაში ხართ და კიდევ ვერ დაიმახსოვრეთ, რომ არ ისაუბროთ წარსულზე. თქვენგან განსხვავებით მე მეამაყება ყოველი წუთი და წამი იმ 9 წლის. თქვენ შეგრცხვებათ აუცილებლად“,- განაცხადა წითლიძემ.

ამასთან, ანა წითლიძემ ანრი ოხანაშვილის მისამართით საკუთარი კითხვა დააზუსტა და მომხსენებელს უთხრა, რომ კონკრეტულად უპასუხოს.

„კონკრეტული კითხვა დაგისვით და კონკრეტულად მიპასუხე თუ შეიძლება - მე გკითხეთ, იქნებ წარმოგვიდგინოთ რამე კვლევა, ეროვნული უსაფრთხოების კვლევა განახლებული, სადაც წერია, რომ ამ ქვეყანაში არსებობს საფრთხეები უცხოური აგენტების“,- განაცხადა ანა წითლიძემ.