ჩვენ უნდა დავუმტკიცოთ ბიძინა ივანიშვილს და მთელ დედამიწას, რომ ეს ხალხი საკუთარი სამშობლოს სიყვარულში არ იღლება, - ამის შესახებ ორგანიზაცია „სამოქალაქო იდეის“ თავმჯდომარემ თინა ხიდაშელმა „ინტერპრესნიუსს“ პარლამენტთან განუცხადა, სადაც მომიტინგეები იკრიბებიან.

ხიდაშელმა გუშინ, „ქართული ოცნების“ მიერ ჩატარებული შეკრება და იქ ხელისუფლების მიერ გაკეთებული განცხადებები შეაფასა და აღნიშნა, რომ მისთვის არ იყო მოულოდნელი ის განცხადებები, რაც „ქართული ოცნების“ საპატიო თავმჯდომარემ ბიძინა ივანიშვილმა გააკეთა.

„ჩემთვის არაფერი მოულოდნელი არ ყოფილა ბიძინა ივანიშვილის განცხადებაში. ამ კანონის დროის ამ მომენტში შემოტანა მდგომარეობს იმაში, რომ ხალხი დაღალონ, დაღალონ მიტინგი, რომ შემოდგომისთვის ენერგია აღარ ჰქონდეს ხალხს. ჩემთვის ეს იყო ყველაზე მთავარი იმიტომ, რომ „ქართული ოცნების“ სხვა ლიდერებისგან განსხვავებით, ბიძინა ივანიშვილს გულწრფელობის წუთები აქვს ხოლმე და შემდეგ სიმართლის ლაპარაკს იწყებს. ზუსტად ამაზე უნდა გასცენ მას პასუხი, როგორც ოპოზიციურმა სპექტრმა, ისე ქართულმა საზოგადოებამ. ჩვენ უნდა დავუმტკიცოთ მასაც და მთელ დედამიწას, რომ ეს ხალხი საკუთარი სამშობლოს სიყვარულში არ იღლება. ძალიან მარტივი ამოცანა გვაქვს - არ უნდა დავიღალოთ ჩვენი სამშობლოს სიყვარულში. მე შემიძლია ვთქვა, რომ არ უნდა დავიღალო იმისთვის, რომ ჩემი შვილებიც ამ გამზირზე არ გაიზარდონ, როგორც მე გავიზარდე“, - განაცხადა ხიდაშელმა.