პოლიტიკური გაერთიანება „ახალის“ ერთ-ერთი ლიდერის, ნიკა გვარამიას განცხადებით, მიმდინარე აქციების გეგმა ყოველდღე იქნება ის, რომ ბიძინა ივანიშვილი ხელისუფლებიდან წავიდეს.

როგორც ნიკა გვარამიამ პარლამენტთან მიმდინარე აქციაზე „ინტერპრესნიუსთან“ აღნიშნა, ის ახალგაზრდებს მოუწოდებს, რომ თავს გაუფრთხილდნენ, თუმცა, პირველ რიგში, სამშობლო დაიცვან.

„ეს ხალხი არსად წავა. ჩვენ ერთი სამშობლო გვაქვს და აქედან წასასვლელი არ გვაქვს. ვის აქვს წასასვლელი ვიცით და ისინი წავლენ კიდეც - რუსეთში. ჩვენთვის ასე არ არის, ჩვენი სამშობლოა, აქ დავიბადეთ, აქ გავიზარდეთ, აქ ვცხოვრობთ, შვილების გაზრდაც აქ გვინდა და სიკვდილიც. ჩვენ წასვლას არსად ვაპირებთ.

გეგმა ყოველდღე იქნება ის, რომ ბიძინა ივანიშვილი წავიდეს. ვნახოთ, რამდენ ხანს გაგრძელდება ასე. ახალგაზრდებს მოვუწოდებ, რომ თავს გაუფრთხილდნენ, მაგრამ პირველ რიგში, სამშობლო დაიცვან“, - განაცხადა ნიკა გვარამიამ.