ისრაელის თავდაცვის ძალებმა ღაზის სექტორის ქალაქ რაფაჰის ცენტრალური ნაწილის მცხოვრებლებს ევაკუაციისკენ მოუწოდა, რაც იმაზე მიანიშნებს, რომ ქალაქში დაწყებული სამხედრო ოპერაციების გაფართოება იგეგმება.

ისრაელის თავდაცვის ძალებმა გასულ კვირას ევაკუაციისკენ რაფაჰის აღმოსავლეთ ნაწილის მცხოვრებლებს მოუწოდა, რის შემდეგაც სამხედრო ოპერაცია დაიწყო და რაფაჰის სასაზღვრო გამშვები პუნქტი დაიკავა. 150 000-ზე მეტმა ადამიანმა უკვე დატოვა ქალაქი. ევაკუაციისკენ ახალი მოწოდება კი იმაზე მიანიშნებს, რომ ისრაელი სამხედრო ოპერაციის გაფართოებას აპირებს და ქალაქის დატოვება კიდევ ასობით ათას ადამიანს მოუწევს. ისრაელის პრემიერ-მინისტრი, ბენიამინ ნეთანიაჰუ არ დაეთანხმა აშშ-ის მოწოდებას, რაფაჰზე შეტევა არ განეხორციელებინა და განაცხადა, რომ ქალაქს „ჰამასის“ ლიდერებისა და ძალების უმეტესობა აფარებს თავს.