ბექა ლილუაშვილი - „ქართული ოცნება“ დამარცხებულია, ამას სჭირდება ჩვენ მიერ გაფორმება - ვაგრძელებთ ბრძოლას ყველა ტრიბუნის და საშუალების გამოყენებით - ქუჩაშიც, პარლამენტშიც

„ქართული ოცნება“ დღეს დამარცხებულია, ამას სჭირდება ჩვენ მიერ გაფორმება - ვაგრძელებთ ბრძოლას ყველა ტრიბუნის და საშუალების გამოყენებით - ქუჩაშიც, პარლამენტშიც,- ამის შესახებ პარტია „გახარია საქართველოსთვის“ დეპუტატმა ბექა ლილუაშვილმა პარლამენტში გამართულ ბრიფინგზე განაცხადა.

მისი თქმით, ყველამ ერთად უნდა იმოქმედოს, რათა „ხელისუფლება ჩაბარდეს პოლიტიკურ წარსულს“.

„ქართულმა ოცნებამ“, მისმა სადეპუტატო დაჯგუფებამ მთლიანად გაიყვანა ქვეყანა საკონსტიტუციო ფარგლებს გარეთ და უზრუნველყო ის, რომ შენობაში, სადაც საქართველოს დამოუკიდებლობის აქტს მოეწერა ხელი, მიიღო კანონი, რომელმაც ეს დამოუკიდებლობის აქტი ფაქტობრივად გააუქმა და შეცვალა ქვეყნის კონსტიტუციით განსაზღვრული საგარეო ვექტორი. უნდა გვესმოდეს, რომ ამ მოცემულობაში არ გვაქვს საშუალება, კანონის მიღმა გასულ ხელისუფლებას ერთი ამოსუნთქვით შევაცვლევინოთ კურსი. ამას სჭირდება მომზადება, თითოეული ჩვენგანის ერთობა, განგრძობითად მუშაობა, წინააღმდეგობა, პროტესტი. ყველამ ერთად უნდა ვიმოქმედოთ იმისთვის, რომ ხელისუფლება ჩაბარდეს პოლიტიკურ წარსულს. „ქართული ოცნება“ დღეს დამარცხებულია, ამას სჭირდება ჩვენ მიერ გაფორმება. ვაგრძელებთ ბრძოლას ყველა ტრიბუნის და საშუალების გამოყენებით - ქუჩაშიც, პარლამენტშიც. „ქართული ოცნებიდან“ არავის მივცემთ იმის კომფორტს, რომ როგორც დღეს უნდოდათ, თავის ჭკუაზე მიეღოთ კანონი ისე, რომ ხმა არ გამოსულიყო პარლამენტის შენობიდან. როგორც გუშინ კომიტეტზე მიიღეს მალულად, ფარულად - ამის საშუალება არ ექნებათ. თუ გვინდა, მუხტი შევინარჩუნოთ საზოგადოებაში, თუ გვინდა, რომ ისინი საბოლოოდ დავამარცხოთ და წერტილი დავუსვათ, გვჭირდება ბრძოლა გაათმაგებული შემართებით. მოვუწოდებთ ყველა თავისუფლად მოაზროვნე, თავისუფალ მოქალაქეს, დღეს, ხვალ და მომდევნო კვირების, თვეების განმავლობაში ვიდგეთ ერთად, ვიბრძოლოთ ერთად, ჩვენ აუცილებლად გავიმარჯვებთ!“- განაცხადა ბექა ლილუაშვილმა.

ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
Webster University Georgia-ს რექტორი ჟან პოლ ვან მარისინგი - უნივერსიტეტს აქვს პოტენციალი, რეგიონის საგანმანათლებლო ჰაბი გახდეს
ქართული პრესის მიმოხილვა 24.06.2024
„საქკაბელმა“ ბრონირებული NAYBY კაბელის წარმოება დაიწყო
4 რჩევა სამსუნგის ინჟინრებისგან თუ როგორ გამოიყენო Windfree კონდიციონერი ყველაზე ეფექტურად