ენტონი ბლინკენი მოლდოვასა და ჩეხეთს ეწვევა, - ამის შესახებ ინფორმაციას აშშ-ის სახელმწიფო დეპარტამენტი ავრცელებს.

„კიშინიოვში, მდივანი ბლინკენი მოლდოვის პრეზიდენტს, მაია სანდუს და სხვა ოფიციალურ პირებს შეხვდება, რათა მოლდოვის ევროკავშირში გაწევრიანებისა და ენერგეტიკული უსაფრთხოების მიმართ აშშ-ის მხარდაჭერა კიდევ ერთხელ დაადასტუროს“, - ნათქვამია აშშ-ის სახელმწიფო დეპარტამენტის განცხადებაში.

ენტონი ბლინკენი პრაღაში ჩეხეთის საგარეო საქმეთა მინისტრს, იან ლიპავსკის შეხვდება და თავდაცვის მოდერნიზაციის, ენერგეტიკული კავშირების გაღრმავებისა და უკრაინის მხარდაჭერის საკითხებს განიხილავს.

პრაღაში ყოფნისას, აშშ-ის სახელმწიფო მდივანი ნატო-ს საგარეო საქმეთა მინისტრების არაფორმალურ შეხვედრაში მიიღებს მონაწილეობას, სადაც ვაშინგტონის სამიტის პრიორიტეტების განხილვა მოხდება.

აშშ-ის სახელმწიფო დეპარტამენტის ცნობით, ენტონი ბლინკენი კიშინიოვსა და პრაღას 28-31 მაისს ეწვევა.