შალვა პაპუაშვილი - გამჭვირვალობის ქართული კანონი ყველაზე რბილი კანონია, რაც კი არსებობს მსგავსი კანონები მსოფლიოში - რა ხელშეუვალი კასტა გახდა არასამთავრობო სექტორი, რომ მათ ჰქონდეთ პრივილეგია იმოქმედონ ფარულად?
გამჭვირვალობის ქართული კანონი ყველაზე რბილი კანონია, რაც კი არსებობს მსგავსი კანონები მსოფლიოში - გამჭვირვალობის ამაზე დაბალი სტანდარტი არც ერთ სამართლებრივ სივრცეში არ არსებობს! კანონი ასევე რბილია იმ რეაგირების მხრივ, რაც სახელმწიფოს ექნება, თუ კანონს არ შეასრულებენ, - ასეთია პარლამენტის თავმჯდომარის, შალვა პაპუაშვილის შეფასება, რომლის ხელმოწერითაც “უცხოური გავლენის გამჭვირვალობის შესახებ“ კანონი ამოქმედდება.
როგორც პაპუაშვილმა აღნიშნა, საქართველოს პარლამენტის მიერ მიღებული კანონი მისი არშესრულების შემთხვევაში მხოლოდ ფინანსურ ჯარიმებს ითვალისწინებს, ხოლო სხვაგან არის სისხლის სამართლის პასუხისმგებლობა, ორგანიზაციის ლიკვიდაცია და ასევე, სავალდებულო ტესტირება.
მისივე თქმით, “უცხოური გავლენის გამჭვირვალობის შესახებ“ კანონი ერთადერთ ვალდებულებას ითვალისწინებს და ეს არის წელიწადში ერთხელ ფინანსების დეკლარირება.
“ამას აკეთებენ სახელმწიფო ინსტიტუტები, პოლიტიკური პარტიები, საჯარო მოხელეები. რა ხელშეუვალი კასტა გახდა ეს არასამთავრობო სექტორი, რომ მათ ჰქონდეთ პრივილეგია იმოქმედონ იმ მოქალაქეებისგან ფარულად, ვისაც როგორც თვითონ ამბობენ, წარმოადგენენ?“,- განაცხადა შალვა პაპუაშვილმა.
