საქართველოში ჩამოსული ტურისტებისთვის ჯანმრთელობისა და უბედური შემთხვევის სავალდებულო დაზღვევა 2026 წლის 1-ელ იანვრამდე გადავადდა.

პარლამენტმა მესამე მოსმენით მხარი დაუჭირა “ტურიზმის შესახებ“ კანონში ცვლილებას, რომლის მიხედვით, საქართველოში ჩამოსულ ტურისტებს ჯანმრთელობისა და უბედური შემთხვევის დაზღვევის ქონის ვალდებულება 2026 წლის 1-ელ იანვრამდე არ ექნებათ - პარლამენტის მიერ მიღებული კანონპროექტით, კანონის შესაბამისი ნორმა 2026 წლის 1-ელ იანვრამდე გაჩერდა.

პროექტი პარლამენტს “ქართული ოცნების“ დეპუტატებმა წარუდგინეს.

„ტურიზმის შესახებ“ კანონის შესაბამისად, საქართველოში შემომსვლელ ტურისტს ჯანმრთელობისა და უბედური შემთხვევის სავალდებულო დაზღვევა უნდა ჰქონდეს. აღნიშნული პირობა კი, 2024 წლის 1-ელი ივნისიდან უნდა ამოქმედებულიყო.

როგორც პროექტი ინიციატორები განმარტავენ, “საქართველოში შემომსვლელი ტურისტების ჯანმრთელობისა და უბედური შემთხვევის სავალდებულო დაზღვევის წესისა და პირობების დამტკიცების შესახებ“ დადგენილების შემუშავების პროცესში მთელი რიგი საკითხები გამოიკვეთა, რამაც კანონის შესაბამისი მოთხოვნის 2026 წლის 1-ელ იანვრამდე შეჩერება გახადა მიზანშეწონილი.

„იკვეთება, რომ კერძო სექტორი ადაპტირებისთვის დამატებით ვადებს საჭიროებს და ამ ეტაპისთვის, მოსალოდნელ ცვლილებებს ვერ ხვდება მზად.

ახალი რეგულაციების დანერგვა და ამოქმედება საჭიროებს მრავალსაფეხურიან მოსამზადებელ პროცესს - მათ შორის კერძო სექტორის, ასევე უცხო ქვეყნის საელჩოებისა და საკონსულოების სათანადო ინფორმირებას, საინფორმაციო კამპანიების წარმოებას და სხვა შესაბამისი სახის ღონისძიებების გატარებას, რაც ეფექტიანად დაეხმარება სექტორს აღნიშნულ ცვლილებებთან ადაპტირების პროცესში“, - აღნიშნულია კანონის პროექტის განმარტებით ბარათში.