გერმანია უკრაინას Patriot-ის მესამე სისტემის გადაცემით, რომელსაც ქვეყანა უახლოეს მომავალში მიიღებს, ამ იარაღის საკუთარი მარაგის მეოთხედს გადასცემს, - ამის შესახებ გერმანიის თავდაცვის მინისტრმა, ბორის პისტორიუსმა ბრიუსელში, ნატო-ს თავდაცვის მინისტრების შეხვედრის დაწყებამდე განაცხადა.

„ეს არის ჩვენი საკუთარი რეზერვების მეოთხედი, მეტის გადაცემის შესაძლებლობა არ არსებობს“, - არ აღნიშნა პისტორიუსმა.

მისი თქმით, გერმანიამ წამოიწყო ინიციატივა უკრაინის საჰაერო თავდაცვის გასაძლიერებლად, რომელმაც უკვე მიაღწია გარკვეულ წარმატებას, მაგრამ გაუმჯობესება კიდევაა შესაძლებელი.

პისტორიუსმა განმარტა, რომ გერმანია უზრუნველყოფს Patriot-ის მართვაზე წვრთნებს და უკრაინას რაკეტებს გადასცემს. კერძოდ, უკრაინას, ცოტა ხნის წინ, 32 ასეთი რაკეტა გადაეცა, კიდევ 68-ის მიწოდება კი უახლოეს დღეებსა და კვირებში იგეგმება.

„ამ რაკეტების შეძენა განხორციელდა გერმანიის, დანიის, ნორვეგიისა და ნიდერლანდების ერთობლივი ძალისხმევის ფარგლებში“, - აღნიშნა პისტორიუსმა.

მისი თქმით, პარტნიორები აგრძელებენ Patriot-ის წარმოების გაზრდის ყველა შესაძლებლობის შესწავლას, აწარმოებენ მოლაპარაკებებს მწარმოებლებთან აშშ-ში ა.შ., მაგრამ პრობლემა ის არის, რომ წარმოებას და მიწოდებას დრო სჭირდება.