გია ვოლსკი - არავის ეგონოს, რომ ფიზიკური შეურაცხყოფა რაღაცით უფრო მეტია, ვიდრე ფსიქოლოგიური შეტევა, რამაც შეიძლება ადამიანის ჯანმრთელობა ბევრად უფრო სერიოზულად დაანგრიოს, ვიდრე ფიზიკურმა ძალადობამ
არავის ეგონოს, რომ ფიზიკური შეურაცხყოფა რაღაცით უფრო მეტია, ვიდრე ფსიქოლოგიური შეტევა, რამაც შეიძლება ადამიანის ჯანმრთელობა ბევრად უფრო სერიოზულად დაანგრიოს, ვიდრე ფიზიკურმა ძალადობამ, - ეს განცხადება დღეს მედიასთან პარლამენტის პირველმა ვიცე-სპიკერმა გია ვოლსკიმ გააკეთა.
ვოლსკის თქმით, განცხადებები იმის თაობაზე, თითქოს ვიღაც თავდამსხმელი ცნობილია, უსაფუძვლოა იმ შემთხვევაში, თუკი ამას ვერ ამტკიცებენ.
როგორც ვოლსკიმ ამ კონტექსტში აღნიშნა, დღეს საქართველოში სიძულვილის ენა ძალიან ინტენსიურად გამოიყენება.
"ვფიქრობ, ეს ორივე მხრიდან გამოიყენება, მაგრამ რადიკალური ოპოზიციის მხრიდან სიძულვილის ენას გეგმაზომიერი, კამპანიური ხასიათი აქვს, რაც გარკვეული სახელმძღვანელოების მიხედვით ხორციელდება.
არის ფიზიკური შეჯახების პროვოცირება, ადამიანის უშვერი სიტყვებით გინება, რასაც შეიძლება ფიზიკური დაპირისპირებაც მოჰყვეს. ეს ძალიან ცუდია და ამის გაკეთება ორივე მხრიდან უნდა დაიგმოს.
არავის ეგონოს, რომ ფიზიკური შეურაცხყოფა რაღაცით უფრო მეტია, ვიდრე ფსიქოლოგიური შეტევა, რასაც გეგმაზომიერი ხასიათი აქვს და რამაც შეიძლება ადამიანის ჯანმრთელობა ბევრად სერიოზულად დაანგრიოს, ვიდრე ფიზიკურმა ძალადობამ.
არც სიტყვიერ და არც ფიზიკურ დაპირისპირებას არ ვამართლებთ და არც მისაღებად მიგვაჩნია!" - განაცხადა ვოლსკიმ.
კითხვაზე, ამ დრომდე რატომ არავინ არის გამოვლენილი და დაკავებული, ვინც ოპოზიციურად განწყობილი ადამიანების ცემაში მიიღო მონაწილეობა, ვოლსკიმ განაცხადა, რომ საგამოძიებო პროცესი დაწყებულია.
"არ ვარ მართლმსაჯულების წარმომადგენელი - ვარ პოლიტიკოსი და ვაკეთებ პოლიტიკურ განმარტებას. დანარჩენი ჰკითხეთ ძალოვნებს, რატომ არ არის სისხლის სამართლის საქმე აღძრული. რამდენადაც ვიცი, საქმე აღძრულიც არის და გამოძიებაც მიმდინარეობს. განცხადებები იმის თაობაზე, თითქოს ვიღაც თავდამსხმელი ცნობილია, არის უსაფუძვლო იმ შემთხვევაში, თუკი ამას ვერ ამტკიცებენ", - განაცხადა პარლამენტის პირველმა ვიცე-სპიკერმა.
