დავით ქაცარავა - სამართალდამცავებისადმი ჩემი მიდგომა ყოველთვის კორექტული იყო - როცა უმოწყალოდ მცემდნენ, მაშინაც კი არ ყოფილა ერთი შეურაცხმყოფელი სიტყვა

სამწუხაროა, როცა პოლიციელები ჩემზე ამბობენ, იგინებოდაო, - ამის შესახებ "ანტისაოკუპაციო მოძრაობის" წვერმა, დავით ქაცარავამ სასამართლო პროცესზე განაცხადა, სადაც მის მიმართ ადმინისტრაციული სახდელის დადებაზე მსჯელობენ.

ქაცარავას თქმით, მას შეურაცხმყოფელი სიტყვები არ გამოუყენებია.

"ჩემი მიდგომა სამართალდამცავებთან ყოველთვის იყო კორექტული. როცა მანქანაში შემათრიეს და მცემდნენ, 3-ჯერ განხორციელდა სპეცრაზმელების მხრიდან ცემის ფაქტი, რასაც მიღებდნენ. იქაც კი მივამართავდი და ვუსვამდი კითხვას, რატომ მცემდნენ ასე უმოწყალოდ. იქაც არ ყოფილა შეურაცხმყოფელი სიტყვები. ერთი სიტყვაც კი არ იყო შეურაცხმყოფელი ჩემს მიმართვაში", - განაცხადა ქაცარავამ.

პროცესზე ჩვენებას სამართალდარღვევის ოქმის შემდეგნი პოლიციელი, ბიძინა ჟამერაშვილი აძლევს. მისი ჩვენების მიხედვით, ქაცარავას სპეცრაზმელები ტერიტორიის დატოვებისკენ მოუწოდებდა.

"ის ამბობდა, 40 კილომეტრში რუსის ჯარია და აქ რატომ დგახართ, რუსეთის მონებოო. რუსის მონას რომ გეძახიან, შეურაცხმყოფელია, ბევრს მათთან ბრძოლაში ოჯახის წევრი ჰყავს დაღუპული. როცა საჭირო მომენტი იყო, სპეცრაზმელების მხრიდან მისი დაკავება მოხდა", - განაცხადა პოლიციელმა.

მას მოსამართლე კობა ჩაგუნავამ ჰკითხა, დავით ქაცარავა აგინებდა თუ არა პოლიციელებს, რასაც სამართალდამცავმა უარყოფითი პასუხი გასცა.

"პოლიციელების მიმართ არ შეუგინებია. ძირითადად, კანონის მიმართ ჰქონდა უცენზურო მიმართვა საზოგადოებრივი თავშეყრის ადგილას, კანონის მისამართით იგინებოდა", - განაცხადა პოლიციელმა ჟამერაშვილმა.

მოსამართლემ მას ჰკითხა, ჰქონდა თუ არა სამხრე კამერები. მოწმემ უპასუხა, რომ ჰქონდა, თუმცა ჩართული არა.

ამასთან, პოლიციელმა განაცხადა, რომ ქაცარავას დაკავებამდე დაზიანებები არ ჰქონდა, ხოლო როცა მასთან მივიდა, რათა სპეცრაზმის მანქანიდან მის მანქანაში გადაესვა, უკვე დაზიანებები აღენიშნებოდა და მას სასწრაფო სამედიცინო დახმარება აღმოუჩინეს.

დავით ქაცარავამ პოლიციელ ბიძინა ჟამერაშვილს მადლობა გადაუხადა დახმარებისთვის.

"მადლობას გეუბნებით იმ ადამიანური მიდგომისთვის, რომელიც პატრულის 4 თანამშრომლის მხრიდან ვიგრძენი, როცა იმ ჯალათებისგან გადამიბარეს. თუ თქვენც იქ იყავით, მადლობას გიხდით", - განაცხადა ქაცარავამ.

მან პოლიციელს ჰკითხა, გაიგო თუ არა მან მისი მხრიდან სიტყვა "მონის" გამოყენება, რასაც სამართალდამცავმა დადებითი პასუხი გასცა.

ქაცარავას ადმინისტრაციულ სამართალდარღვევათა კოდექსის 166-ე და 173-ე მუხლებით მუხლებით გათვალისწინებულ დანაშაულს ედავებიან, რაც პოლიციელისადმი დაუმორჩილებლობასა და წვრილმან ხულიგნობას გულისხმობს.

პოლიციის მხრიდან დავით ქაცარავას მიმართ სამსახურებრივი უფლებამოსილების ძალადობით გადამეტების ფაქტზე, სპეციალურმა საგამოძიებო სამსახურმა გამოძიება დაიწყო. აღნიშნულ საქმეში ქაცარავას დაზარალებულის სტატუსი აქვს.

ირაკლი მელაშვილი - ხელისუფლებასა და ოპოზიციას შორის რაიმე იდეოლოგიური კომპრომისის ადგილი ფაქტობრივად აღარ არსებობს, არჩევანია ან აქეთ - ევროპისკენ, ან იქით - რუსეთისკენ
ქართული პრესის მიმოხილვა 18.07.2024
კახეთის გზატკეცილზე „კარფურის” სუპერმარკეტი უკვე გაიხსნა
„ბიოგრაფი ლივინგი“ დეველოპერულ ბაზარზე მოღვაწეობის პირველივე წლის ბოლოს მე-4 ახალ პროექტს იწყებს
Keepz-მა ღია ბანკინგის ლიცენზია მიიღო
გაზმომარაგების უმსხვილესმა კომპანია, „თბილისი ენერჯიმ“ BDO Digital-თან პარტნიორობით კიბერ და ინფორმაციული უსაფრთხოების საერთაშორისო სტანდარტი, ISO/IEC 27001:2022 დანერგა
საქართველოს უნივერსიტეტის ჯანმრთელობის მეცნიერებების სკოლა
ახალი „ლენდ კრუიზერ პრადო“ - ლეგენდის თანამედროვე გაგრძელება
20 ივლისიდან სილქნეტი ოპტიკური ინტერნეტის სიჩქარეებს გაზრდის