პრეზიდენტს ვესაუბრეთ ჩვენს გეგმებზე და იმ სამომავლო გაერთიანებაზე, რომელსაც საზოგადოება ძალიან მალე გაიგებს - ამის შესახებ „ლელოს“ ლიდერმა მამუკა ხაზარაძემ „ინტერპრესნიუსს“ სალომე ზურაბიშვილთან შეხვედრის შემდეგ განუცხადა.

როგორც ხაზარაძემ აღნიშნა, ახალი პოლიტიკური გაერთიანების ლიდერები და პრეზიდენტი საუბრისას შეთანხმდნენ იმაზეც, რომ იქნება სერიოზული აქტიურობა ემიგრაციის მიმართულებით, რათა ქვეყნიდან გასულმა ემიგრანტებმა არჩევნებში მიიღონ მონაწილეობა.

„პრეზიდენტთან შეხვედრა, როგორც ყოველთვის, იყო ძალიან საინტერესო. ჩვენ ვართ სტრატეგიული პარტნიორები იმ საკითხში, რასაც ჰქვია ქვეყნის ევროპული მომავალი. ჩვენ გავაცანით ის გეგმები და ის გადადგმული ნაბიჯები, რომლებიც რამდენიმე დღის წინ გადავდგით. ეს არის დიდი პლატფორმის შექმნა „თავისუფლების მოედანთან“ და ანა დოლიძის პარტიასთან. ვესაუბრეთ ასევე იმ მომავალ გაერთიანებასთან დაკავშირებით, რომელიც ბოლო დღეებში ძალიან ბევრი გვაქვს კონსულტაციის სახით და რომელზეც საზოგადოება ძალიან მალე გაიგებს. შევთანხმდით, რომ იქნება ძალიან სერიოზული აქტიურობა ემიგრაციის მიმართულებით - გვინდა, რომ ჩავრთოთ ჩვენი ემიგრანტები ქვეყნისთვის ამ გადამწყვეტ და მნიშვნელოვან არჩევნებში“, - აღნიშნა მამუკა ხაზარაძემ.