საქმიანობა, რომელსაც „საქსტატი“ ახორციელებს, უმნიშვნელოვანეს როლს თამაშობს საქართველოს განვითარებაში, - ამის შესახებ ფინანსთა მინისტრმა, ლაშა ხუციშვილმა „სტატისტიკის“ ეროვნული სამსახურის 105 წლისადმი მიძღვნილ ღონისძიებაზე სიტყვით გამოსვლისას განაცხადა.

მისი თქმით, სწორი ფისკალური პოლიტიკის დაგეგმვისათვის, ხარისხიან, სანდო და ყოვლისმომცველ ინფორმაციას გადამწყვეტი მნიშვნელობა აქვს.

მან ხაზი იმ მნიშვნელოვან როლს გაუსვა, რომელსაც ქვეყნის განვითარებისათვის, დამოუკიდებელი და მაღალკვალიფიციური სტატისტიკის სამსახური ასრულებს. ქვეყანაში საერთაშორისო, საუკეთესო პრაქტიკის დანერგვით წარმოებული სტატისტიკური მონაცემების რეგულარული წარმოების გზით.

„ამ კუთხით სტატისტიკის სამსახური ნამდვილად გამორჩეული ინსტიტუციაა, რომელიც მუდმივად აუმჯობესებს საკუთარი საქმიანობის ხარისხს და ამარაგებს პოლიტიკის განმახორციელებლებსა, თუ სხვა დაინტერესებულ პირებს მაღალი ხარისხის ინფორმაციით. აღსანიშნავია, რომ 2019 წელს წარმატებით განხორციელდა SNA2008 მეთოდოლოგიაზე გადასვლა, ხოლო მიმდინარე წელს მოხდა მშპ-ის და ეროვნული ანგარიშების სხვა ინდიკატორების მონაცემთა მწკრივის გადასინჯვა ევროპის მონაცემთა გადასინჯვის ჰარმონიზებული პოლიტიკის შესაბამისად (Harmonized European Revision Policy). 2020 წელს „საქსტატმა“ ერთ-ერთმა პირველმა დანერგა შრომის საერთაშორისო ორგანიზაციის ILO-ს ახალი მეთოდოლოგია. დასაქმება-უმუშევრობის სტატისტიკაში აღსანიშნავია, რომ მსოფლიო ბანკის მონაცემების მიხედვით, საქართველოს სტატისტიკის სისტემა მსოფლიოში მე-15 ადგილზეა, ხოლო ევროპის საუკეთესო ქვეყნების ოცეულში მე-14 ადგილს იკავებს“, - განაცხადა ლაშა ხუციშვილმა, რომლის კომენტარსაც საქართველოს ფინანსთა სამინისტრო ავრცელებს.

უწყების ცნობით, მან ასევე ისაუბრა თანამშრომლობის იმ პრაქტიკაზე, რომელიც ფინანსთა სამინისტროსა და სტატისტიკის ეროვნულ სამსახურს აქვს.

„თანამშრომლობა სამუშაო ჯგუფების ფორმატში მუშაობას გულისხმობს, მონაცემთა სწრაფ და უპრობლემო გაცვლას, მითუმეტეს რომ სტატისტიკის საწყისი მონაცემების ერთ-ერთი წყარო, ფინანსთა სამინისტროს სხვადასხვა საქვეუწყებო ინსტიტუტები არიან. ჩვენ ერთობლივ მუშაობას წინ, კიდევ არაერთი საინტერესო გამოწვევა უდგას, მათ შორის, ევროკავშირის წევრობის კანდიდატის სტატუსის მიღებასთან ერთად, აქტიურად ვმუშაობთ სტატისტიკის შემდგომი რეფორმირების მიმართულებით“, - აღნიშნა ლაშა ხუციშვილმა.

სიტყვის დასასრულს, ლაშა ხუციშვილმა სტატისტიკის სამსახურის თითოეულ თანამშრომელს მიულოცა საიუბილეო თარიღი და წარმატება უსურვა კიდევ ერთ მნიშვნელოვან პროექტში, რომელსაც „საქსტატი“ წელს ახორციელებს - ესაა მოსახლეობის საყოველთაო აღწერა.